کرناٹک: انسداد گئو کشی قانون کے خلاف ریاست گیر مہم چلائی جائے گی
بنگلورو، 2؍ستمبر (ایس او نیوز) کرناٹک میں بھارتیہ جنتا پارٹی کے اقتدار میں آنے کے ساتھ ہی ریاست میں کسانوں، جمعیت قریش اور سماجی کارکنان کے سخت احتجاج کے باوجود انسداد گئو کشی قانون کو پہلے آرڈیننس کے ذریعے لایا گیا اور بعد میں اسے اسمبلی و کونسل میں پاس کرکے قانون کی شکل دی گئی۔
مختلف طبقات کی جانب سے بھارتیہ جنتا پارٹی(بی جے پی) کے انسداد گئوکشی قانون کو لائے جانے کے سلسلے میں کہا گیا کہ بی جے پی کا یہ اقدام نہ صرف غیر آئینی و غیر دستوری ہے بلکہ عوام مخالف ہے۔
بی جے پی حکومت کی جانب سے نافذ کیے گیے انسداد گئو کشی قانون 2020 کے خلاف جمیعت قریش و کسانوں کی جانب سے مختلف آئینی حقوق کا حوالہ دیتے ہوئے ہائی کورٹ میں پی آئی ایلز دائر کئے گئے ہیں۔
دستوری حقوق جیسے 'کھانے یا غذا کا حق، اس کاروبار سے منسلک لوگوں کا بڑے پیمانے پر بیروزگار ہونا، بیل یا سانڈ جو کسان پالتے ہیں ان کا بڑا نقصان ہونا وغیرہ، کو بنیاد بناکر یہ پی آئی ایلز درج کروائی گئی ہیں۔
حالانکہ ہائی کورٹ میں انسداد گئو کشی قانون 2020 پر سماعت جاری ہے اور پیٹیشنرز پُرامید بھی ہیں کہ انہیں انصاف ملے گا تاہم جمیعت قریش کی جانب سے بی جے پی کے اس متنازعہ قانون کے خلاف ریاست گیر مہم چلانے کے ضمن میں تیاریاں شروع کی جارہی ہیں۔
اس بابت شعیب الرحمٰن قریشی نے بتایا کہ کرناٹک میں انسداد گئوکشی قانون بی جے پی کی دوہری پالیسی اور منافقت کو پیش کرتا ہے جب کہ آسام اور گوا میں گئوکشی پر کوئی پابندی نہیں ہے بلکہ وہاں پر گئوکشی کو بی جے پی ہی بڑھاوا دیتی ہے۔
جمیعت قریش کے رکن و پیٹیشنر شعیب الرحمٰن قریشی نے بتایا کہ بہت جلد وہ کسانوں و دیگر ہم خیال تنظیموں کے ساتھ مل کر متحدہ طور پر بی جے پی کے بنائے گئے عوام مخالف انسداد گئوکشی قانون 2020 کے خلاف ریاست گیر مہم چلائیں گے۔
