بنگلورو،29/اپریل (ایس او نیوز) اس مرتبہ مقررہ وقت سے پہلے ہی یعنی 30اپریل کو ایس ایس ایل سی امتحانات کے نتائج کا اعلان کردیا جائے گا۔ اس بات کی اطلاع محکمہ تعلیمات کے پرنسپل سکریٹری ایس آر اوما شنکر نے دی ہے۔ انہوں نے بتایا کہ  کل 30/اپریل کو صبح پریس کانفرنس کے ذریعے امتحانی نتائج کا اعلان ہوگا اور دوپہر میں ویب سائٹ پر نتائج ظاہر کردئے جائیں گے۔

انہوں نے بتایاکہ اس مرتبہ بھی کامیاب ہونے والے طلبا کو ایس ایم ایس کے ذریعے نتائج روانہ کئے جائیں گے۔

خیال رہے کہ 22مارچ تا 4/اپریل ایس ایس ایل سی امتحانات منعقد کئے گئے تھے۔

طلباء ویب سائٹ www.kaceb.kar.nic.in اور www.karresults.nic.in  پر بھی نتائج دیکھ  سکتے ہیں۔

ریاست کے 2847 امتحانی مراکز میں 8.41 لاکھ سے زائد طلبا نے امتحانات لکھے تھے۔ جن میں 4651 معذور طلباء بھی شامل تھے۔

یاد رہے کہ گزشتہ سال ریاست بھر میں ایس ایس ایل سی میں ضلع اڈپی نے پہلا مقام حاصل کیاتھا۔

واضح رہے کہ اس سے قبل نتائج کے تعلق سے محکمہ  تعلیمات نے صبح  اعلان کیا تھا کہ 2مئی کو نتائج ظاہر کئے جائیں گے، مگر شام میں دوبارہ اعلان کیا گیا کہ کل ہی نتائج ظاہر کردئے جائیں گے۔ اور اسکولوں میں 2مئی کو نتائج کاجائزہ لیا جاسکے گا۔ امتحانی بورڈ کی ڈائرکٹر وی سمنگلا نے بتایا ہے کہ اگر طلباء اپنا رول نمبر 56263کو مقررہ کوڈ کے ساتھ ایس ایم ایس کریں تو انہیں جوابی ایس ایم ایس کے ذریعے ان کا نتیجہ روانہ کیا جائے گا۔ انہوں نے بتایاکہ اس مرتبہ بورڈ کے ذریعے جوابی پرچوں کی جانچ ڈجیٹل نظام کے تحت کی گئی ہے۔ اس کے پیش نظر نتائج ظاہر کرنے میں آسانی ہوئی ہے۔