بنگلورو،13؍ جولائی(ایس او نیوز) کرناٹک میں کورونا متاثرین کی تعداد میں مزید اضافہ ہوا ہے۔ ہفتہ اوراتوار کے درمیان کرناٹک میں 2627 نئے کیس سامنے آئے ہیں۔ جس کے ساتھ ریاست میں اب تک متاثر ہونے والوں کی تعداد 38843 تک جا پہنچی ہے۔ اتوار کے روز مزید 71 لوگوں کی موت کے ساتھ ریاست میں اب تک کورونا وائرس کا شکار ہونے والے افراد کی تعداد 684 تک جا پہنچی ہے۔
محکمہ صحت کی طرف سے جاری اطلاع کے مطابق پوری ریاست میں اب تک 15409 متاثرین صحت یاب ہوچکے ہیں۔ گزشتہ 24 گھنٹوں کے دوران بنگلورو میں سب سے زیادہ 1525 کیس سامنے آئے جس کے ساتھ ہی بنگلورو میں جملہ متاثرین کی تعداد 16862 تک جا پہنچی ۔ دکشن کنڑا ضلع میں 196 نئے معاملات سامنے آئے۔ اس ضلع میں متاثرین کی تعداد 2230 تک جا پہنچی ہے۔