بھٹکل میں ریاستی تہوار کرناٹکا راجیہ اُتسوا دھوم دھام سےمنایاگیا
بھٹکل:یکم نومبر(ایس اؤ نیوز) تعلقہ انتظامیہ بھٹکل، تعلقہ پنچایت بھٹکل، میونسپالٹی بھٹکل اور پٹن پنچایت جالی کے اشتراک سے یکم نومبر کو ریاستی تہوار کرناٹکا راجیہ اُتسوا دھوم دھام سےمنایاگیا۔
تعلقہ کے نیو انگلش اسکول سے بھونیشوری دیوی کی ریلی کو رکن اسمبلی سنیل نائک نے ہری جھنڈی دکھائی۔ پھر یہ ریلی نوائط کالونی تعلقہ اسٹڈیم عرف وائی ایم ایس اے میدان پہنچ کر جلسہ میں تبدیل ہوگئی۔
پروگرام میں خطاب کرتے ہوئے رکن اسمبلی سنیل نائک نے بتایا کہ تاریخ صرف محظوظ ہونے کے لئے نہیں ہے، ریاست بھر میں ہر روز راجیواتسوا ہونا چاہئے۔ بھٹکل اسسٹنٹ کمشنر ساجد ملا نے اس موقع پر خطاب کرتےہوئے کہا کہ متحدہ کرناٹکا کی تشکیل ایک جدوجہد سے بھری ہوئی ہے، ذات پات ، دھرم سے اوپر اٹھ کر ریاست کی ترقی کے لئےہرایک کو متحرک ہونےکی ضرورت ہے۔ بھٹکل کنڑا ساہتیہ پریشد کے صدر گنگادھر نائک نے کنڑا زبان اور اس کی ثقافت کے متعلق مقالہ پیش کیا۔
تحصیلدار وی پی کوٹرولی نے استقبال کیا۔ ڈائس پر پنچایت ممبر وشنو دیواڑیگا، ہنومنت نائک، پنچایت کارگزار افسر پربھاکر چکمنے ، بلدیہ چیف آفیسر دیوراجو ، سی پی آئی ایم ایس پرکاش، جالی پنچایت کے چیف آفیسر وینو گوپال شاستری، بھٹکل سرکاری اسپتال کی میڈیکل افسر ڈاکٹر سویتا کامت، آر ایف اؤ سویتا دیواڑیگا وغیرہ موجود تھے۔ بی ای اؤ منجی نے شکریہ اداکیا۔ استاد شری دھر شیٹھ نے نظامت کی۔
پروگرام میں مختلف میدانوں میں کارکردگی کا مظاہرہ کرنےو الوں کی تہنیت کی گئی ۔ جن میں انجمن ڈگری کالج شعبہ کنڑا کے صدر آر ایس نایک ، میڈیکل آفیسرڈاکٹر سویتا کامت اور ایس ایس ایل سی امتحانات کے کنڑا مضمون میں 125میں 125نمبرات حاصل کرنے والے 12طلبا کی بھی تہنیت کی گئی ۔
جلسہ کے فوری بعد مختلف اسکولی بچوں نے رنگا رنگ ثقافتی پروگرام پیش کیا۔