کرناٹک کے 16اضلاع میں مسلسل بارش کے پیش نظر، اسکولوں اور کالجوں کو15اگست تک تعطیل کااعلان
بنگلورو9 اگست (ایس او نیوز/آئی این ایس انڈیا) کرناٹک میں مسلسل بارش کے مدِ نظر بیدر کے بشمول جنوبی کنڑا‘ رائچور‘باگلکوٹ‘ بیلگاوی‘ چکوڈی‘ شیموگہ‘ ہاویری‘کوڈگو‘ کوپل‘ یادگیر‘ کلبرگی‘ دھارواڑ‘بلاری‘ ہاسن اْڈپی‘ گدگ اضلاع میں 15اگست تک تمام اسکولوں اور کالجوں میں تعطیل کا اعلان کیا گیا ہے۔کرناٹک میں سیلاب اور بارش سے متاثرہ علاقوں سے ابھی تک تقریبا43,000افراد کو بچایا گیا ہے۔ بارش کی وجہ سے 9افراد ہلاک ہوگئے ہیں۔سرکاری ذرائع نے بتایا کہ سب سے زیادہ متاثرہ بیلگاوی ضلع ہے جہاں سے 40,180افراد کو بچایا گیا ہے۔ضلع میں 6لوگوں کی موت ہوچکی ہے۔سرکاری اعداد و شمار کے مطابق جنوبی شمالی کنڑا ضلع میں بارش سے متعلق حادثات میں 2افراد کی موت ہوگئی ہے۔یہاں سے ابھی تک 3,088افراد کوباہر نکالا گیا ہے۔تقریبا17,000افراد امداد ی کیمپوں میں پناہ لئے ہوئے ہیں۔چیف منسٹر مسٹر بی ایس یدی یورپا بیلگاوی میں قیام کئے ہیں اور ریلیف اور ریسکیو مہم پر نظر رکھے ہوئے ہیں۔ انھوں نے بیلگاوی میں بارش سے متاثرہ شیواجی نگر اور گاندھی نگر کا دورہ کیا۔ایک عہدیدار نے بیان میں بتایا ہے کہ آبی ذخائر سے پانی جاری کرنے کا عمل اچھی طرح سے ہم آہنگ ہے اور پروٹوکول کے مطابق کے نشیبی علاقوں کو ڈوبنے سے بچایا جاسکے۔ بڑی تعداد میں پانی چھوڑنے سے متاثرہونے والے دیہاتوں کی شناخت کرلی گئی اور ضروری احتیاطی تدابیر اختیار کی جارہی ہیں۔سرکاری ذرائع نے بتایا کہ فائر اینڈ ایمرجنسی محکمہ‘ اسٹیٹ ڈریزاسٹر ریسپانس فورس‘نیشنل ڈیرزاسٹر ریسپانس فورس اور آرمی کی مشترکہ امدادی ٹیموں نے اب تک شمالی، ساحلی اور ملناڈ خطہ کے متاثرہ اضلاع سے اب تک کل43,858افراد کو باہر نکالا ہے۔اس درمیان جنوبی مغربی ریلوے پونا منڈلپور‘ پاچاپور‘گوکاک اور کچھ دیگر علاقوں پر موسلادھار بارش ک کی وجہ سے پٹریاں زیرآب ہونے کی وجہ سے 18ٹرینوں کو منسوخ کرنے کا اعلان کیا گیا ہے۔