کرناٹک کو1,471ٹنس آکسیجن کی فوری ضرورت ہے: وزیر اعلیٰ ایڈی یورپا
بنگلو رو،24؍اپریل (ایس او نیوز) ریاستی وزیر اعلیٰ بی ایس ایڈی یورپا نے آج جمعہ کے دن وزیراعظم نریندر مودی سے کہا ہے کہ اگر ریاست کرناٹک میں فوراً آکسیجن کا انتظام نہ ہو سکا تو چند ہیلتھ کیر سہولتوں کو بند کرنا پڑے گا۔
انہوں نے وزیراعظم سے یہ بھی واضح کیا ہے کہ ریاست میں کووڈ 19کی صورتحال ابھی قابو میں نہیں ہے۔ نریندر مودی کے ساتھ ویڈیو کانفرنس کے دوران ایڈی یورپا نے مرکز سے کرناٹک کیلئے 1,471ٹنس آف آکسیجن فراہم کرنے کامطالبہ کیا ہے تاکہ کووڈ۔19کے مریضوں کا علاج کیا جاسکے۔
انہوں نے اس کانفرنس کے دوران وزیراعظم کو بتایا کہ کرناٹک میں آکسیجن کا استعمال دن بہ دن بڑھ رہا ہے۔کل بروز جمعرات ایک ہی دن میں 500ٹن آکسیجن کا استعمال ہواہے۔ وزیراعلیٰ کے دفتر سے جاری اطلاع کے مطابق مرکز نے ریاست کو اب تک صرف 300ٹن آکسیجن فراہم کی ہے۔اگر صورتحال یہی رہی تو کرناٹک میں مجبوراً چند ہیلتھ کیر سہولتوں کو بند کرنا پڑے گا۔
ریاست میں آکسیجن کی قلت سے متعلق وزیراعظم کو سمجھاتے ہوئے ایڈی یورپا نے کہا کہ کرناٹک میں 25 اپریل کے بعد1,142ٹنس آکسیجن کی ضرورت پڑے گی۔پھر 30اپریل کے بعد کرناٹک کو 1,471 ٹنس آکسیجن درکار ہے۔کرناٹک میں آکسیجن کی قلت کو دور کرنے کے لئے فوری آکسیجن فراہم کرنے ایڈی یورپا نے مودی پر دباؤ ڈالا۔ایڈی یورپا نے اس کابھی حوالہ دیا کہ ریاست میں کورونا پازیٹیو کی شرح بڑھ کر16فیصد ہوگئی ہے۔بنگلورو کووڈ سے بری طرح متاثر ہے۔ٹمکور، بلاری، میسور، ہاسن اور کلبرگی اضلاع سے بھی زیادہ لوگ متاثر ہونے کی خبریں موصول ہورہی ہیں۔
وزیراعلیٰ نے یہ بھی کہا کہ کرناٹک نے پہلے مرحلے میں 400 کروڑ روپیوں کی مالیت کے کووی شیلڈ ویکسین کے ایک کروڑ ڈوزس خریدنے کا فیصلہ کیا ہے۔ انہو ں نے بتایا کہ کرناٹک میں ویکسی نیشن پروگرام کا اچھا ردعمل ہے۔ اب تک 82لاکھ لوگوں نے ویکسین لگوایا ہے۔ کرناٹک نے مرکز پر پھر دباؤ ڈالا ہے کہ جب مختلف ریاستوں میں ویکسین تقسیم کی جاتی ہیں تو تمام ریاستوں کے ساتھ یکساں سلوک کیا جائے۔ ایڈی یورپا کے مطابق سرکاری اسپتالوں میں بنیادی ڈھانچے اب ٹھیک ہیں۔پچھلے 6مہینوں سے ان اسپتالوں میں بنیادی ڈھانچوں کی ترقی اور سدھار پر زیادہ توجہ دی گئی۔انہوں نے بتایا کہ پرائیویٹ اسپتالوں میں بھی ہمیں %50 بیڈس مل رہے ہیں۔ایڈی یورپا نے اس ویڈیو کانفرنس میں یہ بھی بتایا کہ پرائیویٹ اسپتالوں کو یہ اجازت بھی دی گئی ہے کہ قریبی ہوٹلوں کے ساتھ وہ معاہدہ کرلیں۔ جہاں عارضی طور پر اسپتالوں کا قیام کیا جاسکے۔
انہوں نے مزید کہا کہ کھلے میدانوں میں آئی سی یو سہولت سمیت اسپتالیں قائم کرنے پر بھی ہم غور کررہے ہیں۔ریمڈیسیور انجکشن پر ایڈی یورپا نے کہا کہ اگلے دس دنوں میں کرناٹک کے لئے دو لاکھ ڈوزس کی ضرورت ہے۔یہ فراہم کرنے مودی سے مطالبہ کیا گیا ہے۔ٖ