بنگلورو،3؍اگست(ایس او نیوز؍ایجنسی) لنگایت مٹھ کے ایک سوامی نے پیشن گوئی کی ہے کہ راہول گاندھی ملک کے وزیراعظم بنیں گے. ذرائع سے ملی اطلاع کے مطابق کانگریس قائد راہول گاندھی، کانگریس کے دیگر لیڈران اور پیروکاروں کے ساتھ بدھ کو چتردرگہ میں لنگایت کے مروگرجندرا مٹھ میں لنگایت سوامیوں کا اشیرواد لینے پہنچے تھے جس پر کاویری ہوسا مٹھ سوامی نے کہا کہ وہ اس ملک کے وزیراعظم بنیں گے انہوں نے اپنی پیشن گوئی کی وجہ یہ بتائی کہ اس سے پہلے اندراگاندھی نے اس مٹھ کا دیدار کیا تھا تو وہ ملک کی وزیر اعظم بنی، پھر راجیو گاندھی بھی اس مٹھ میں پہنچ کر آشیرواد لیا تو وہ بھی ملک کے وزیراعظم بنے، اب راہول گاندھی آئے ہیں تو راہول گاندھی بھی ملک کے وزیراعظم بنیں گے۔

مٹھ کے سوامیوں سے ملاقات کے بعد راہول گاندھی نے ٹویٹ کرتے ہوئے لکھا کہ سری جگد گرو موروگراجیندرا ویدیا پیٹھا کا دورہ کرنا اور سوامیوں سے آشیرواد لینا میرے لئے ایک اعزاز کی بات ہے۔

بتادیں کہ لنگایت فرقہ سماجی جہد کار اور شاعر بسویشورا کے ذریعے 21 ویں صدی میں قائم ہوا تھا جن کی کرناٹکا میں بڑی تعداد پائی جاتی ہے ساتھ ساتھ ریاست کے پڑوسی ریاستوں مہاراشٹرا، تلنگانہ، آندھرا اور تمل ناڈو میں بھی لنگایت کی اچھی خاصی تعداد پائی جاتی ہے ۔

کرناٹک کے وزیر اعلی بسواراج بومائی اور ان کے پیشرو بی ایس۔ یدی یورپا کا تعلق اسی لنگایت فرقے سے ہے، جو ریاست کی 17 فیصد آبادی پر مشتمل ہے یہ روایتی طور پر بی جے پی کی حمایت کرتا رہا ہے۔

راہول گاندھی سیاسی امور کمیٹی کے اجلاس میں شرکت کے لئے کرناٹکا پہنچے تھے جبکہ بدھ  کو سابق وزیر اعلیٰ سدارامیا کی 75 ویں سالگرہ کی تقریبات میں بھی انہیں حصہ لینا تھا۔

یاد رہے کہ کرناٹکا میں اسمبلی انتخابات اگلے سال مئی میں منعقد ہوں گے۔ 2013 سے 2018ء تک اقتدار میں رہنے کے بعد کانگریس نے 2018ء میں جنتادل سیکولر کے ساتھ مختصر عرصہ کے لیے حکومت قائم کی تھی، جس کے وزیر اعلیٰ جے ڈی ایس لیڈر ایچ ڈی کماراسوامی  تھے۔

تاہم اتحاد کے کئی ارکان اسمبلی کے استعفوں کے بعد یہ حکومت زائد از ایک سال بعد گرگئی اور بی جے پی ریاست میں دوبارہ برسراقتدار آگئی۔ ابتداء میں بی جے پی نے بی ایس یدی یورپا کو چیف منسٹر بنایا تھا جن کا تعلق لنگایت طبقہ سے ہے۔ گزشتہ سال ان کی جگہ بسواراج بومئی کو وزیراعلیٰ بنایا گیا اور وہ بھی لنگایت سے ہی ہیں۔