بنگلورو۔14/مئی(ایس او نیوز) ریاستی وزیر برائے تعمیرات عامہ ایچ ڈی ریونا نے ان خبروں کو بے بنیاد بتایا ہے کہ لوک سبھا انتخابات کے بعد ریاست میں جے ڈی ایس بی جے پی سے ہاتھ ملانے والی ہے۔ اس سلسلے میں وزیر اعلیٰ ایچ ڈی کمار سوامی اور وزیر اعظم مودی کے درمیان حالیہ ملاقات کے دوران بات چیت کی خبروں کو بھی انہوں نے من گھڑت قرار دیا ہے۔
اخباری نمائندوں سے بات چیت کرتے ہوئے انہوں نے کہاکہ وزیراعظم مودی سے کمار سوامی کی ملاقات کے دوران وہ خود بھی موجود تھے۔ اس موقع پر کسی بھی سیاسی مسئلے پر دونوں کے درمیان بات چیت نہیں ہوئی۔ لوک سبھا انتخابات کے بعد بی جے پی سے ہاتھ ملاکر ریاست میں حکومت برقرار رکھنے کے متعلق خبریں بھی فرضی ہیں۔ ریونا نے کہاکہ ریاست میں کانگریس جے ڈی ایس مخلوط حکومت گزشتہ ایک سال سے کام کررہی ہے، چھوٹے موٹے اختلافات کو چھوڑ کر دونوں پارٹیوں کے درمیان کوئی بڑا مسئلہ نہیں ہے۔ بعض کانگریس اراکین اسمبلی کے بی جے پی میں شامل ہوجانے کے متعلق خبروں کو بھی بی جے پی کی خوش فہمی قرار دیتے ہوئے انہوں نے یقین ظاہر کیا کہ بی جے پی ایک بھی کانگریس یا جے ڈی ایس رکن اسمبلی کو اپنے خیمے کی طرف راغب نہیں کرپائے گی۔