بنگلورو: گرام پنچایت کے انتخابات 6 ماہ کے لئے ملتوی۔ ریاستی حکومت نے بھیجی الیکشن کمیشن کو تجویز
بنگلورو14/اپریل (ایس او نیوز)کورونا وائرس وباء کی وجہ سے معاشی، تعلیمی اور سماجی سرگرمیاں جہاں ٹھپ ہوگئی ہیں، وہیں پر سیاسی سرگرمیوں کو ملتوی کرنا حکومت کے لئے ضروری ہوگیا ہے۔ اسی پس منظر میں ریاستی حکومت نے الیکشن کمیشن کو تجویز بھیجی ہے کہ ریاست میں ہونے والے گرام پنچایت انتخابات کو 6 ماہ تک کے لئے ملتوی کیا جائے اور اس کا انعقاد نومبر میں کیاجائے۔
حالانکہ پنچایت راج قانون1933کے مطابق گرام پنچایت کی میعاد ختم ہونے کے بعد انتخابات کو ملتوی کرنے کی گنجائش نہیں ہے، لیکن مرکزی حکومت کی طرف سے کورونا وباء کے پیش نظر ملک میں نیشنل ایمرجنسی کا اعلان کررکھاہے۔ اس وجہ سے اسکولوں اور کالجوں کے امتحانات بھی ملتوی کیے گئے ہیں۔ اسی سبب سے گرام پنچایت کے انتخابات بھی ملتوی کرنا ضروری ہوگیا ہے۔