کرناٹک میں 8؍نومبر سے ایل کے جی اور یو کے جی کلاسس بحال
بنگلورو،5؍نومبر(ایس او نیوز)ریاستی حکومت نے ایل کے جی اور یو کے جی کے لئے 8نومبر سے باضابطہ کلاسوں کی بحالی کی اجازت دے دی ہے۔ اس سلسلہ میں محکمہ تعلیمات نے رہنما خطوط بھی وضع کئے ہیں۔ اسکول کے اوقات صبح 9:30بجے سے دوپہر 3:30بجے تک مقرر کئے گئے ہیں اور اس کی بنیاد پر ٹائم ٹیبل تیار کرنے کا حکم دیا گیا ہے۔ حکومت نے ہدایت دی ہے کہ کلاسس ہفتہ میں صرف پانچ دنوں کے لئے ہوں گے۔ ہفتہ اور اتوار چھٹی ہو گی۔بچوں میں اگر کووِڈ کی علامت ہو تو ان کو اسکول آنے نہیں دیا جائے گا اور اگر کسی بچے میں کووِڈ کی تصدیق ہوتی ہے تو اسکول کو مکمل طور پر سینی ٹائز کرنا لازمی ہو گا۔اس کام کو مقامی ہیلتھ آفیسر کی نگرانی میں کروایا جائے۔اس سے پہلے جن کلاسوں کو بحال کیا گیا ان میں تدریس کرنے والے اساتذہ کے لئے یہ پابندی تھی کہ انہوں نے کووِڈ ویکسین کے دونوں ڈوز لے لئے ہوں۔ اب ایل کے جی اور یو کے جی میں جو بچے حاضر ہوں گے ان کے والدین پر بھی یہ لازمی ہے کہ انہوں نے بھی کووِڈ ویکسین کے دونوں ڈوز لے لئے ہوں، ورنہ بچوں کو اسکول میں حاضری کی اجازت نہیں دی جائے گی۔ اسکول میں آنے والے ہر بچے کی صحت کا خیال رکھنے کی ذمے داری اساتذہ پر ہو گی۔ سرکاری، ایڈڈ اور ان ایڈڈ اسکولوں میں ایل کے جی اور یو کے جی کلاسوں کا آغاز پہلے مرحلہ میں آدھے دن تک کرنے کی اجازت دی گئی ہے۔ اسکول صرف ان اضلاع میں ایل کے جی اور یو کے جی کے لئے کھلیں گے جہاں کووِڈ پازیٹیویٹی کی شرح2فیصد سے کم ہو۔اسکولوں میں حاض ری کے لئے والدین کی منظوری لازمی قرار دی گئی ہے۔ ماسک پہنا لازمی قرار دیاگیا ہے۔ بچوں کو دوپہر کا کھانا گھروں سے ہی لانا ہو گا۔ تمام اسکولوں میں گرم پانی کی فراہمی کے لئے نظم کیا جائے گا۔حاضر بچوں کی تعدادکی بنیاد پر ہر کلاس میں ان کے بیٹھنے کے لئے سماجی فاصلہ کی پابندی کے ساتھ انتظام کیا جائے گا۔ اسکول میں داخل ہوتے وقت بچوں کی تھرمل اسکیاننگ لازمی ہو گی۔ اگر کسی بچے کے گھر میں کسی کو کورونا وائرس کی تصدیق ہوئی ہے تو والدین سے کہا جائے کہ اس بچے کو اسکول نہ بھیجیں۔ رہنما خطوط میں کہاگیا ہے کہ والدین کے اصرار پر حکومت کی طرف سے کلاسس بحال کر دئیے گئے ہیں، اب والدین کی بھی یہ ذمہ داری ہے کہ وہ بچوں کی صحت کا خیال رکھیں۔