بنگلور ۔12 / جنوری (ایس او نیوز) کرناٹکا ہائی کورٹ نے کرناٹک پردیش کانگریس کمیٹی (کے پی سی سی) سے کہا کہ وہ 14 جنوری تک میکے ڈاٹو پدیاترا نکالنے کے لئے حکومت کی طرف سےلئے گئے اجازت نامہ کو عدالت میں پیش کرے۔ عدالت نے پوچھا کہ کیا کے پی سی سی نےرام نگر ضلع کے میکے ڈاٹو میں کاویری ندی کے پار متوازن آبی ذخائر کا مطالبہ کرتے ہوئے 'واک فور واٹر' منعقد کرنے کی کوئی اجازت لی ہے یا نہیں۔
چیف جسٹس ریتو راج اوستھی اور جسٹس سورج گووند راج کی ڈویژن بنچ نے ناگیندر پر ساداے وی کی طرف سے دائر درخواست کی سماعت کرتے ہوۓ سیاسی جماعت کو یہ بھی بتانے کی ہدایت دی کہ آیا وہ کووڈ کے چلتے جاری کئے گئے گائیڈلائنس پر عمل کر رہے ہیں جیسے کہ ماسک پہننا اور سماجی دوری برقرار رکھنا وغیرہ ؟
ڈویژن بنچ نے ریاستی حکومت سے بھی جمعہ کو اس بات کا جواب دینے کے لئے کہا ہے کہ KPCC کو ریلی کے انعقاد کی اجازت کیسے دی گئی ؟ بنچ نے حکومت سے پوچھا کہ کے پی سی سی کو ریلی کے انعقاد سے روکنے کے لیے کس طرح کے اقدامات کیے گئے ہیں ؟
حکومت کرناٹک نے کووڈ کے بڑھتے معاملات کو دیکھتے ہوئے 4 جنوری سے ریاست میں احتجاجی ریلیوں، مظاہروں اور لوگوں کے اجتماع پر پابندی لگا دی تھی۔ اس کے باوجود، کانگریس نے اپنی 'پد یاترا' (مارچ) کے ساتھ یہ کہتے ہوئے آگے بڑھی کہ حکومت کووڈ معاملوں کی تعداد کو بڑھا چڑھا کر پیش کر رہی ہے، اورایسا کرکے وہ پارٹی کے پروگرام کے طے کردہ پدیاترا کو خراب کرنے کی کوشش کر رہی ہے۔