بنگلورو شہر کی جھیلوں پر غیر قانونی قبضہ جات کا معاملہ، بی بی ایم پی ایکزی کٹیو انجینئروں کو ہائی کورٹ کا سمن
بنگلورو،17؍جولائی(ایس او نیوز)کرناٹک ہائی کورٹ نے کل یہاں جھیلوں پر غیر قانونی قبضہ جات کے سلسلے میں بروہت بنگلورو مہا نگر پالیکے (بی بی ایم پی) کے ایکزی کٹیو انجینئروں کو سمن جاری کیا ہے۔
ان سے کہا گیا ہے کہ وہ شہر کی جھیلوں پر ان قبضوں کے بارے میں وضاحت کرنے 20جولائی کو عدالت کے سامنے حاضر ہوں۔ ہائی کورٹ میں سبرامنیا پورہ، بیگور اور پٹین ہلی میں ان قبضہ جات سے متعلق ایک عرضی پر سماعت جاری ہے۔
اس سلسلے میں کئے گئے اقدامات اور ایجنسی کے قونصل کی جانب سے پیش کی گئی رپورٹ سے غیر مطمئن عدالت نے متعلقہ ایکزی کٹیو انجینئروں کو حکم دیا کہ وہ عدالت میں حاضر رہیں اور اس کی آخری تاریخ بتائیں کہ یہ قبضہ جات کب تک ہٹائے جائیں گے۔نگران کار چیف جسٹس الوک ارادھے کی قیادت والی ڈویژن بنچ نے بی بی ایم پی کو خوب آڑے ہاتھوں لیا اور کہا کہ غیر قانونی قبضہ جات ہٹانے کے لئے صرف خطوط لکھ دینا کافی نہیں ہے۔
عدالت نے جمعہ کواس بات پر بھی غصے کا اظہار کیا کہ 2جون کو اس عدالت کی جانب سے ان قبضہ جات کے بارے میں جاری ہدایات پر کوئی عمل نہیں ہوا ہے۔