بنگلورو،7؍ستمبر(ایس او  نیوز) گھر کے دروازے تک جاکر لوگوں کو شراب مہیا کرانے کاکوئی منصوبہ ریاستی حکومت کے زیر غور نہیں ہے۔ اس بات کی وضاحت ریاستی ایکسائز وزیر ایچ ناگیش نے کی۔آج وکاس سودھا میں ایکسائز محکمہ کے کام کاج کا جائزہ لینے کیلئے منعقدہ اجلاس میں شرکت کے بعد اخباری نمائندوں سے خطاب کرتے ہوئے انہوں نے کہا کہ کل میں نے جو بیان دیاتھا اسے توڑ مروڑ کر پیش کیا گیا ہے۔ میں نے کہا تھا کہ گجرات میں آن لائن شراب فروخت کی جارہی ہے۔ اس نظام کے ریاست میں رائج کرنے پر غور کیا جارہا ہے۔ میری بات کاغلط مطلب نکالا گیا اور کہا گیا کہ ریاستی حکومت صارفین کو ان کے گھروں تک جاکر شراب فروخت کرنے کا منصوبہ رکھتی ہے۔ انہوں نے واضح کیا کہ ریاستی حکومت کا ایسا کوئی منصوبہ نہیں ہے۔شراب کی آن لائن فروخت کے تعلق سے ریاستی وزیر کا بیان شوشیل میڈیا پر وائرل ہوگیا تھا۔