کورونامریضوں کے راست رابطہ میں آنے والوں کو 14دنوں کیلئے سرکاری اسپتالوں میں لازمی کوارنٹائن کیاجائے گا
بنگلورو،30؍مارچ(ایس او نیوز) کورونا وائرس کے مریضوں کے راست طورپر رابطہ میں آنے والے لوگوں کو اب لازمی طورپر 14دنوں کے لئے کوارنٹائن کیاجائے گا۔ اس سے قبل ایسے لوگوں کوان کے گھروں میں علاحدہ رکھ کر نگرانی کی جاتی تھی۔ کورونا وائرس کی روک تھام کے سلسلہ میں محکمہ صحت کے اعلیٰ سطحی اجلاس میں یہ فیصلہ کیاگیا۔
محکمہ صحت کے ایک افسر نے بتایاکہ ریاست میں اب تک کورونا وائرس کے جتنے معاملے سامنے آئے ہیں۔ ان میں سے25فیصد مریض کورونا وائرس کے مریضوں سے راست رابطہ کی وجہ سے اس مرض میں مبتلا ہوئے ہیں۔ کورونا وائرس کے مریضوں کے راست رابطہ میں آنے والے افراد کوان کے گھروں میں علاحدہ رکھاگیا۔ ان کے بازو پرمہر پر کوارنٹائن کی باقاعدہ مہر بھی لگائی گئی۔ اس کے باوجود یہ لوگ اپنے گھروں سے باہر نکل آرہے ہیں جس کی وجہ سے شہرمیں کوروناوائرس مزید پھیلنے کاخدشہ بڑھ گیاہے۔
اس لئے حکومت نے فیصلہ کیاہے ان افراد کوسرکاری اسپتالوں میں کورنٹائن کیاجائے۔ ان لوگوں کو حکومت کی طرف سے نشاندہ مخصوص اسپتالوں،گیسٹ ہاؤز اورہوٹلوں میں 14دنوں کیلئے علاحدہ رکھا جائے گا۔ ایسے افرادجن کو یہ مرض لاحق ہونے کاخدشہ زیادہ رہتاہے انہیں سرکاری اسپتالوں میں داخل کیاجائے گا۔