8؍ جون سے مساجد کھلیں گی؛ ریاستی اقلیتی کمیشن کی طرف سے رہنما خطوط جاری
بنگلورو،7؍ جون (ایس او نیوز) کرناٹک میں 8 جون سے مساجد کے دروازے عوام کیلئے کھول دیئے جائیں گے۔ 2؍ ماہ سے زائد عرصہ کے بعد مصلیوں کو مسجد میں داخل کرنے کا موقع ملے گا۔ کورونا وائرس وباء نے زندگی کے ہر شعبہ کو متاثر کرتے ہوئے عبادتوں میں بھی خلل پیدا کیا ہے۔
مرکزی حکومت سے اجازت ملنے کے بعد کی ریاستی حکومت نے 8 ؍ جون سے تمام عبادت گاہوں کو عوام کیلئے کھولنے کا فیصلہ لیا ہے۔ حکومت کے اس اعلان کے بعد کرناٹک ریاستی اقلیتی کمیشن نے مسجدوں کیلئے گائیڈ لائن جاری کی ہیں۔ امام ، مصلی جہاں تک ہوسکے گھروں سے ہی وضو بنا کر آئیں، مسجد میں وضو کیلئے حوض کا استعمال ہر گز نہ کیا جائے ، حوض کے بجائے نل کا استعمال کیا جائے ۔ بیت الخلاء پاک و صاف رکھے جائیں، مسجد میں داخل ہونے اور باہر نکلنے کیلئے صرف ایک دروازے کو کھولا جائے، داخلہ کے وقت ہر مصلی کی تھرمل اسکریننگ کی جائے تا کہ درجہ حرارت کا پتہ چل سکے، نماز شروع ہونے سے قبل مسجد کے ہال کو ہر وقت سینی ٹائز کیا جائے، نماز کیلئے بنائی جانے والی صف میں ہرشخص کے درمیان ایک سے دو میٹر کا فاصلہ ہو،ہر مصلی اپنی اپنی ٹوپی پہن کر مسجد میں داخل ہو، ماسک کے ذریعہ ناک اور منہ کو ڈھک لیں، فرض نماز 10 سے 15 منٹ کے وقفہ میں ادا کی جائے ۔ اگر مصلیوں کی تعداد زیادہ ہو تو دو مرتبہ جماعت بنائی جائے، تمام مصلی سنت اور نفل گھروں میں ادا کریں، نماز مکمل ہونے کے بعد مصلی مسجد میں نہ بیٹھیں ، جمعہ کی نماز بھی عربی خطبہ کے ساتھ 15 سے 20 منٹ کے وقفہ کے اندر ادا کی جائے۔ مسجد اور درگاہوں کے احاطہ میں فقیروں کو اکٹھا ہونے نہ دیا جائے، مسجدوں اور درگاہوں میں شیرنی تقسیم کرنے ، کھانے پینے کا نظم نہ کیا جائے، کورونا کی وباء کے پیش نظر درگاہوں میں مزاروں کو بوسہ دینے سے گریز کیا جائے ، کورونا کی وباء ختم ہونے تک لوگ آپس میں مصافحہ کرنے، گلے ملنے سے گریز کریں ۔ریاستی اقلیتی کمیشن کے چیرمین اور سابق پولیس عہدیدار عبدالعظیم نے تحریری طور پر یہ تمام ہدایتیں جاری کی ہیں۔
انہوں نے کہا کہ کرناٹک اور ملک کی دیگر ریاستوں میں کورونا کے پوزیٹیوکیس بڑھ رہے ہیں ۔ ڈاکٹرس کے مطابق کورونا کو وباء طویل عرصہ سے تک انسانوں کی زندگی میں رہ سکتی ہے۔ اس لئے لوگ روزمرہ کے کام کاج اور عبادتوں کے موقع پر بھی مکمل طور پر احتیاط برتیں۔اخبار نویسوں سے بات چیت کرتے ہوئے عبدالعظیم نے کہا کہ مسجد وں میں سینی ٹائز یشن ، صفائی اور دیگر احتیاطی تدابیر کے نفاذ کو یقینی بنانے وقف بورڈ آگے آئے، مسجدوں کیلئے خصوصی فنڈ جاری کرے۔