رام نگرم، 30؍اگست (ایس او نیوز) گذشتہ دو تین دنوں سے جاری موسلادھار بارش کے بعد اتوار اور پیر کو رام نگرم اور چن پٹن میں جس طرح سیلاب جیسی صورتحال پید ا ہوئی تھی اور کئی مکانوں کے اندر پانی داخل ہونے سے لاکھوں مالیت کا نقصان ہوا تھا، اس کا جائزہ لینے آج ریاست کے وزیراعلیٰ بسوراج بومائی نے دورہ کیا اور بارش سے ہوئی تباہی اور اس کے نقصانات کے بارے میں جانکاری حاصل کی۔
انہوں نے نیو ہائی وے روڈ، بخشو کا تالاب، رام نگرم ٹاؤن، چن پٹن بیڑی کالونی پہنچ کرحالات کا جائزہ لیا ۔وزیراعلیٰ کے ہمراہ ریاستی وزراء آر اشوک، اشوتھ نارائن، سابق وزیراعلیٰ ایچ ڈی کمار سوامی، رکن پارلیمان ڈی کے سریش، رکن اسمبلی انیتا کمار سوامی، صدر بلدیہ پاروتمابھی موجود تھیں۔ تمام متاثرہ علاقوں کا دور ہ کرنے کے بعد انہوں نے افسران کو ہدایت دی کہ بغیر کسی تاخیر کے امدادی کارروائی کی جائے۔ شہر رام نگرم اور چن پٹن کے دو ہزار سے زیادہ گھروں کو بہت زیادہ نقصان پہنچاہے۔ انہوں نے کہا کہ متاثر ہ علاقوں میں جو بھی بڑا نقصان ہواہے ان کیلئے 5لاکھ روپئے فراہم کئے جائیں گے۔ سلک فیکٹری اور قیمتی اشیاء کے نقصان کیلئے فی کس تین لاکھ روپئے کی امداد،گھر کی دیوارگرنے پر پچاس ہزار روپئے کی مالی امداد کا اعلان کیا ، انہوں نے وعدہ کیا کہ امداد جلد سے جلد متاثرین تک پہنچائی جائے گی۔ وزیراعلیٰ نے کہا کہ قدرتی آفات کے پیش آنے پر ہمیں مل جل کر ایک دوسرے کی مدد کرنی چاہے۔ جہاں تک مجھے اس بات علم ہے کہ رام نگرم کی تاریخ میں پہلی بار اتنی بڑی تباہی دیکھنے میں آئی ہے۔