ریاستی حکومت کی ناکامیوں کے متعلق کانگریس کے سلسلہ وارٹوئٹ ۔ ’بومئی کے دورہئ دہلی سے کرناٹک کو ایک پیسے کا بھی فائدہ نہیں‘
بنگلورو،12؍ستمبر(ایس او نیوز)وزیر اعلیٰ بسوراج بومئی نے کرناٹک کا اقتدار سنبھالنے کے بعد سے اب تک چار بار دہلی کا دورہ کیا ہے، لیکن اس دورے سے کرناٹک کو ایک پیسے کا بھی فائدہ نہیں ہوا۔یہ طنز کانگریس پارٹی نے اپنے ٹوئٹر پر کیا ہے۔ پارٹی کی طرف سے اس موضوع پر سلسلہ وار ٹوئٹ کرتے ہوئے ریاستی حکومت کو نشانہ بنایا گیا ہے۔ پارٹی نے کہا ہے کہ ریاست کے وزیر اعلیٰ بدل گئے لیکن کرناٹک کے تئیں مرکزی حکومت نے سوتیلے سلوک میں کوئی تبدیلی نہیں لائی۔اقتدار سنبھالنے کے چند ہی دنوں میں وزیر اعلیٰ بومئی نے دہلی کا چار مرتبہ دورہ کیا، لیکن ان دوروں سے کرناٹک کو ایک پیسے کا بھی فائدہ نہیں ہوا۔کرناٹک کو مرکزی حکومت کی طرف سے واجب الادا جی ایس ٹی بقایاجات میں سے ایک روپیہ بھی ادا نہیں کیا گیا۔ ریاست میں کورنا ویکسین کی قلت کو دور کرنے کے لئے مرکزی حکومت کی طرف سے افزود ویکسین کی روانگی نہیں ہوئی، سیلاب سے متاثرہ علاقوں میں راحت کاری کے لئے مرکزی حکومت سے ایک پیسہ بھی مہیا نہیں کروایا گیا۔ اس کے ساتھ ہی کانگریس پارٹی نے وزیر اعظم مودی کے جنم دن کو تین ہفتوں تک منانے بی جے پی کے اعلان پر طنز کیا ہے اور کہا ہے کہ کیا تین ہفتوں تک جنم دن اس لئے منایا جا رہا ہے کہ سال بھر میں کورونا وائرس کی وجہ سے ملک بھر میں موت کا تانڈو ہوتا رہے۔کیا بی جے پی کورونا وائرس سے نپٹنے کے لئے ناقص انتظام کے ذریعہ عوام کے قتل عام کاجشن منا رہی ہے؟۔آکسیجن نہ ہونے کے سبب سینکڑوں افراد کی موت کا جشن منارہی ہے؟۔بے روزگاری عام کرنے کا جشن منا رہی ہے۔ مہنگائی کا جشن منا رہی ہے یا ملک کی معاشی تباہی کا جشن منا رہی ہے؟اس کے ساتھ کانگریس نے تہوار کے موقع پر نجی بس مالکان کی طرف سے کرایہ دوگنا کر دئیے جانے پر ریاستی حکومت کی خاموشی کونشانہ بنایا ہے اور کہا ہے کہ نجی بس مالکان کی طرف سے جس طرح کی دن دہاڑے لوٹ مچائی گئی، اس پر محکمہ ٹرانسپورٹ خاموش ہے۔ ایسا لگتا ہے کہ نجی بسوں پر ریاستی حکومت کا کوئی کنٹرول نہیں ہے۔ یا وہ خود نجی بس مالکان کو کمانے کا موقع فراہم کرنا چاہتی ہے۔