کووڈ کی تیسری لہر ؟ ساحلی کرناٹکا میں پھر بڑھ رہے ہیں معاملات؛ جنوبی کینرا میں ایک ہی دن 410 معاملات
منگلورو 3؍اگست (ایس او نیوز) ساحلی کینرا میں کووڈ معاملات میں پھر ایک بار اضافہ دیکھا جارہا ہے اور سمجھا جارہا ہے کہ کووڈ کی تیسری لہر دستک دے رہی ہے۔ یکم اگست کو ایک ہی دن ضلع جنوبی کینرا میں 410 کووڈ کے معاملات درج ہونے سے پھر ایک بار کرناٹک بھر میں تشویش کی لہر دوڑ گئی ہے ، بتایا گیا ہے کہ اس دن بنگلور میں بھی 409 معاملات درج کئے گئے ہیں، اس طرح ان دو اضلاع میں اتوار کو ریاست بھر کے مجموعی تعداد کے 43 فیصد معاملات درج ہوئے ہیں۔
جنوبی کینرا کی سرحد کیرلا کے کاسرگوڈ سے ملتی ہے جبکہ ریاست کی سرحد منگلورو سے جنوب کی طرف 25 کلو میٹر ہے۔ کیرلا میں ہفتہ کو 20772 معاملات درج ہوئے تھے ۔ گذشتہ ہفتہ وہاں روزانہ اوسطاً 20 ہزار کے حساب سے کیس درج ہوئے ہیں۔ ریاست کے دیگر مقامات کا جہاں تک تعلق ہے، جنوبی کینرا سے لگے اُڈ پی ضلع میں اس دن 162 جبکہ میسورو میں 146 ، اور ہاسن میں 108 کیس درج کئے گئے ۔
جنوبی کینرا اور اس کے پڑوسی اضلاع میں کووڈ کی بڑھتی شرح کو ددیکھتے ہوئے جنوبی کنڑا ضلعی انتظامیہ نے کرناٹک اور کیرلا کی سرحد پر روزانہ بس خدمات کو معطل کردیا ہے۔جبکہ کرناٹک کی سرحدمیں داخل ہونے کے لئے کووڈ ٹیسٹ کی نیگیٹو رپورٹ کو لازمی کردیا ہے۔