بنگلورو،19؍نومبر (ایس او نیوز؍ایجنسی ) کانگریس کی کرناٹک یونٹ نے ہفتہ کے روز مبینہ ووٹر لسٹ گھوٹالہ کے تعلق سے بی جے پی کے خلاف انتخابی کمیشن میں شکایت درج کرائی۔ کانگریس صدر ڈی کے شیوکمار اور اپوزیشن لیڈر سدارمیا نے ووٹر لسٹ سے 27 لاکھ ووٹرس کو ہٹانے کا تجزیہ کرنے کے لیے کہا تھا۔ انھوں نے گزارش کی ہے کہ برسراقتدار بی جے پی نے اپنے فائدے کے لیے ووٹرس کا ڈاٹا چوری کیا ہے۔ بی جے پی کو جہاں بھی جیتنا مشکل ہو رہا ہے، وہ ووٹرس کا ڈاٹا چرانے کے لیے نجی ایجنسیوں کا استعمال کر رہی ہے۔

ڈی کے شیوکمار نے الزام عائد کیا کہ ان ایجنسیوں نے انتخابی کمیشن کا ڈاٹا اور پاسورڈ وزیر کو دے دیا ہے۔ انھوں نے مطالبہ کیا ہے کہ ووٹرس لسٹ کے از سر نو جائزہ کے بہانے غیر قانونی طریقے سے ووٹرس کے ڈاٹا کی چوری کرنے والوں کے خلاف مجرمانہ معاملے اور ایف آئی آر درج کی جانی چاہیے۔

کانگریس لیڈر شیوکمار نے وزیر سی این اشوناتھ نارائن اور ان کی ٹیم پر سب سے بڑی دھوکہ دہی کرنے کا الزام عائد کیا ہے۔ ان پر ووٹر آئی ڈی ڈاٹا کا غلط استعمال کرنے، دھوکہ دہی کر جانکاری جمع کرنے اور لاکھوں ووٹرس کے نام کاٹنے کا بھی الزام لگایا۔ کانگریس لیڈروں نے وزیر اعلیٰ بومئی کے استعفیٰ اور معاملے کی جانچ کرناٹک ہائی کورٹ کے چیف جسٹس سے کرانے کا مطالبہ کیا۔