بنگلورو،24؍جنوری(ایس او  نیوز) 15 دسمبرکو کرناٹک لیجس لیٹو کونسل میں ہوئے ہنگامے کی جانچ کے لئے قائم ایوان کمیٹی نے ایوان بالا میں ہوئی ہنگامہ آرائی کے لئے نائب وزیر اعلیٰ اشوتھ نارائین اوراس وقت کے وزیر قانون جے سی مادھو سوامی کو ذمہ دار ٹھہرایا ہے۔ کمیٹی کی طرف سے 84صفحات پر مشتمل رپورٹ میں یہ بتایا گیا ہے۔

ایوان کے سینئر ممبر مری تبے گوڑا کی قیادت میں قائم کمیٹی نے اپنی عبوری رپورٹ پیچ کرتے ہوئے قطعی رپورٹ پیش کرنے کے لئے مزید وقت مانگا ہے۔ کمیٹی نے اس ہنگامے میں شامل اشوتھ نارائین، مادھو سوامی اور دیگر ممبران کے خلاف کارروائی کی سفارش کی ہے۔اس کمیٹی میں شامل بی جے پی ممبران ایچ وی سنکنو ر اور ایچ وشواناتھ نے پہلے ہی استعفیٰ دیدیا ہے۔ کمیٹی میں کانگریس کے بی کے ہری پرساد، آربی تماپور شامل ہیں۔کمیٹی نے قطعی رپورٹ پیش کرنے کے لئے مزید وقت مانگا ہے۔ اس ہنگامے کے بارے میں کمیٹی نے ایوان کے مارشل اور کانگریس کے رکن پی آر رمیش کا بیان ریکارڈ کیا ہے۔

ایوان کے ڈپٹی چیر مین ایس ایل دھرمے گوڑا کی خود کشی کے معاملہ میں بھی کمیٹی نے محکمہ داخلہ سے ان کے خط کی مانگ کی ہے جو اب تک مہیا نہیں کروایا گیا ہے۔کمیٹی نے طے کیا ہے کہ ایوان میں ہنگامہ آرائی کے دوران موجود صحافیوں سے بھی بیانات لئے جائیں گے۔