بنگلورو؍12ستمبر(ایس او نیوز) ریاستی وزیر اعلیٰ بی ایس ایڈی یورپا نے کل گذشتہ کہا ہے کہ شہر میں پارکنگ کے بھاری مسئلہ پر قابو پانے کے سلسلہ میں ریاستی حکومت ہائی کورٹ کی عمارت کے سامنے والی خالی جگہ میں زیر زمین گاڑیوں کی پارکنگ تعمیر کرنے کے امکانات پر غور کرے گی، البتہ اس کارروائی کے دوران اس بات کی کوشش ضروری ہوگی کہ ماحول کو کسی بھی طرح کا نقصان ہونے نہ پائے-انہوں نے کہا کہ ریاست حکومت اس بات کی بھی عہد بند ہے کہ وہ کورٹ کے انتظامی بلاک کے لئے سہولیات فراہم کرنے کے سلسلہ میں 20 کروڑ روپئے کی لاگت سے کرناٹک کی چیف الیکٹرول دفتر کے مقام پر ایک چھ منزلہ عمارت تعمیر کرے گی-ریاستی وزیر اعلیٰ شہر میں میٹرو پالیٹن مجسٹریٹ کورٹ کی جدید انیکس کورٹ عمارت کا افتتاح کرنے اور اس کے دوسرے مرحلہ کے تعمیراتی کاموں کے لئے سنگ بنیاد رکھنے کے بعد خطاب کر رہے تھے-انہوں نے کہا کہ موجودہ ثالثی مرکز سے متصل ایک خندانی عدالت کی عمارت بھی کل 120 کروڑ روپئے کی لاگت سے تعمیر کی جائے گی، یہ عمارت زمین دوز احاطہ کے ساتھ 13 منزلہ رہے گی-ریاستی ہائلی کورٹ کے چیف جسٹس ابھے سرینواس اوکا نے بتایا کہ جدید عمارت میں چھ کورٹ ہال اور پارکنگ کی سہولت رہے گی جبکہ دوسرے مرحلہ میں تعمیر ہونے والی عمارت میں مزید نو کورٹ ہال شامل رہیں گے-انہوں نے بتایا کہ مجوزہ خاندانی عدالت کی عمارت میں منظورشدہ تمام 21 خاندانی عادلتوں کے لئے سہولت فراہم کی جائے گی، واضح رہے کہ اس وقت منظور شدہ خاندانی عدالتوں میں سے صرف سات ہی کام کر رہے ہیں -