بنگلورو،28؍اگست (ایس او نیوز) ریاستی وزیربرائے اعلیٰ تعلیم ڈاکٹر سی این اشوتھ نارائن نے بتایاکہ ریاست میں پیشہ وارانہ کورسس میں داخلہ کے خواہشمند طلبہ کے لئے کل 530امتحانی مراکز میں سی ای ٹی2021امتحانات منعقد کرنے کی تمام تیاریاں احتیاطی اقدامات کے ساتھ پوری کرلی گئی ہیں۔

ایک اخباری کانفرنس سے خطاب کرتے ہوئے ڈاکٹر اشوتھ نارائن نے یہ جانکاری دی۔ انہوں نے بتایاکہ 28اگست کو بیالوجی اور میاتھس اور29 اگست کوفزکس اورکیمسٹری کے لئے امتحانات ہوں گے جب کہ ہورناڑو اور سرحدی علاقہ کے طلبہ کے لئے کنڑا امتحان 30اگست کو منعقد کیاگیا ہے۔ انہوں نے بتایاکہ ریاست کے 530امتحانی مراکز میں سے 86 مراکز شہر بنگلورمیں اوربغیر 444مراکز دیگر اضلاع میں قائم کئے گئے ہیں۔

انہوں نے بتایاکہ متعلقہ اضلاع کے ڈپٹی کمشنرز اپنے ضلع کے امتحانی مراکز کے لئے اسسٹنٹ کمشنر سطح کے افسروں کو بطور مشاہد مقرر کریں گے۔ انہوں نے بتایاکہ امتحان کے دن محکمہ داخلہ کی جانب سے مناسب پولیس بندوبست کیاگیا ہے ساتھ ساتھ کل530مشاہد، 1,600خصوصی اسکواڈ،530سوالاتی پرچوں کے نگراں کار8,409 روم سپرنٹنڈنٹس اور20,415افسران وعملہ کو تعینات کیاگیا ہے۔

ڈاکٹر اشوتھ نارائن نے بتایاکہ ہورناڑو اور سرحدی علاقوں کے امیدواروں کوکنڑا امتحان 30اگست کو 6مقامات یعنی بنگلور، بیدر، وجئے پور، بلاری، بیلگاوی اور منگلورو میں منعقد ہوں گے ان امتحانات کے لئے 1,682طلبہ نے رجسٹریشن کرایا ہے۔ انہوں نے کہاکہ امتحانات کے موقع پرطلبہ کو لازمی طورپر ماسک پہننا ہے۔ او ایم آر جوابی پرچے میں امیدواروں کو اپنا نام لکھنا ہے۔ امیدوار سی ای ٹی نمبر، سوالاتی پرچہ کا ورشن کوڈ نمبر، اور ایم آر جوبای پرچے میں لکھ کر متعلقہ سرکلس پر کریں۔

انہوں نے بتایاکہ امیدوار کالج کا شناختی کارڈ، پی یو سی سال دوم کی ہال ٹکٹ، بس پاس، ڈرائیونگ لائسنس، پاسپورٹ، آدھار کارڈ،پیان کارڈ میں سے کوئی ایک ساتھ لے جائیں۔ مزید تفصیلات کے لئے ویب سائٹ دیکھ سکتے ہیں۔ http://ea.kar.nic.in