ریاستی کابینہ میں توسیع جلد کی جائے: کمارسوامی
بنگلورو،31؍جولائی(ایس او نیوز)سابق وزیر اعلیٰ اور ریاستی جنتا دل کے رہنما ایچ ڈی کماسوامی نے وزیر اعلیٰ بسوراج بومئی سے کہا ہے کہ ریاست میں سیلاب کی سنگین صورتحال سے نپٹنے کے لئے وہ اپنی کابینہ میں جلد از جلد توسیع کریں۔
اخباری نمائند وں سے بات کرتے ہوئے انہوں نے کہا کہ اس سے پہلے 2019میں جب ایڈی یورپا وزیر اعلیٰ بنے تو اس وقت بھی ریاست سیلاب کی شدید لپیٹ میں رہی لیکن اس کے باوجود وہ ایک ماہ تک تنہا ریاست کا انتظامیہ چلاتے رہے اور بی جے پی کی مرکزی قیادت نے وزارت میں توسیع کے لئے منظوری نہیں دی۔ کمارسوامی نے کہا کہ بی جے پی کی موجود ہ صورتحال کو دیکھا جائے تو اندازہ ہو تا ہے کہ اعلیٰ کمان کی طرف سے اسی صورتحال کو دہرانے کی کوشش کی جا رہی ہے۔ لیکن ریاست کے مفاد میں اس طرح کی صورتحال بہتر نہیں۔
کمارسوامی نے کہا کہ انہیں نہیں لگتا کہ بی جے پی قیاد ت کی طرف سے وزارت میں توسیع کے لئے بومئی کو اتنی آزادی دی جائے گی اور نہ ہی ان کو جلد وزارت میں توسیع کرنے دیا جائے گا۔کمارسوامی نے کہا کہ کرناٹک میں ایک بار پھر کورونا کی صورتحال میں بگاڑ کے آثار نمایاں ہو چکے ہیں۔ ایسے میں اگر وزارت کی تشکیل دے کر وزراء کوذمہ داریوں کی تقسیم نہ کی گئی تو پریشانی میں اور اضافہ ہو سکتا ہے۔ کمارسوامی نے کہا کہ تنہا بسوراج بومئی زیادہ دن تک ریاست کے انتظامیہ کو سنبھال نہیں سکیں گے۔اس سوال پر کہ بومئی کو ربراسٹامپ وزیر اعلیٰ کہا جا رہا ہے کمارسوامی نے کہا کہ ابھی انہوں نے عہدہ سنبھالا ہے کچھ د ن ان کو کام کرنے دیا جائے بعد میں ہی یہ پتہ چلے گا کہ وہ ربر اسٹامپ وزیر اعلیٰ ہیں یا کچھ اور۔ان سے یہی امید ہے کہ ایڈی یورپا کے انتظامیہ میں جو خامیاں تھیں ان کو دور کرتے ہوئے حکومت چلائیں گے۔ مدھو بنگارپا کے جے ڈی ایس چھوڑ کر کانگریس میں شامل ہو جانے پر کمارسوامی نے مدھو سے اپنی نیک خواہشات کا اظہار کیا۔