کاروار 9/دسمبر (ایس او نیوز) ضلع اُترکنڑا کے یلاپور منڈگوڈ اسمبلی حلقے سے ضمنی انتخاب میں بی جے پی کے امیدوار شیورام ہیبار نے 31,406ووٹوں کی اکثریت سے زبردست جیت درج کرتے ہوئے اپنے قریبی حریف کا نگریسی امیدوار بھیمنّا نائک کو شکست دے دی ہے۔
خیال رہے کہ کانگریس پارٹی سے بغاوت کرکے نااہل قرار پانے والے شیورام ہیبار نے 5 دسمبر کو منعقدہ ضمنی انتخاب بی جے پی کی ٹکٹ پر لڑا تھا۔ 1.72لاکھ ووٹروں والے اس حلقے میں 77.53 فیصد پولنگ ہوئی تھی۔
آج سرسی کے ای ایس کامرس کالج میں ووٹوں کی گنتی عمل میں آئی۔ شیورام کے کھاتے میں 80440ووٹ آئے جب کہ کانگریس کے بھیمنّا نائک 49,034 ووٹوں تک ہی محدود رہے۔
معلوم ہوا ہے کہ 1,444 ووٹ نوٹا کے کھاتے میں پڑے۔ جنتا دل ایس کی امیدوار چیترا 1,235ووٹ، کرناٹکا راشٹرا سمیتی کی امیدوار زیتون بی 443 ووٹ، اتم پراجکیہ پکشا کے امیدوار سنیل پوار 281 ووٹ، آزاد امیدوار چیدانند ہریجن 413 ووٹ اور مہیش ہیگڈے 301ووٹ حاصل کیے۔
یہ بھی پتہ چلا ہے کہ جملہ 10پوسٹل ووٹ پول ہوئے تھے جس میں سے دو ووٹ بی جے پی کے کھاتے میں گئے اور بقیہ 8 ووٹوں کو مسترد کردیا گیا۔