بنگلورو،19/نومبر(ایس او نیوز/آئی این ایس انڈیا) کرناٹک میں 15 اسمبلی سیٹوں پر پانچ دسمبر کو ہونے والے ضمنی انتخابات کے لئے کل 248 امیدواروں نے پرچہ نامزدگی داخل کئے ہیں۔الیکشن افسر نے یہ معلومات دی۔کرناٹک کے چیف الیکشن افسر کی جانب سے بتائے گئے اعداد و شمار کے مطابق 152 امیدواروں نے پرچہ نامزدگی داخل کرنے کے آخری دن یعنی پیر کو 237 نامزدگی داخل کئے۔پیر تک کل 248 امیدواروں نے پرچہ نامزدگی داخل کئے تھے جن میں سے 56 امیدوار قومی پارٹی کے ہیں، 17 امیدوار ریاست کی پارٹیوں سے ہیں۔وہیں 47 امیدوار رجسٹرڈ غیر منظورشدہ پارٹیوں سے ہیں اور 128 آزاد امیدوار ہیں۔سب سے زیادہ 28 امیدواروں نے شیواجی نگر علاقے سے پرچہ نامزدگی داخل کی ہے۔اس کے بعد 27 امیدواروں نے ہوسکوٹے سیٹ سے نامزدگی داخل کی ہے۔پرچہ نامزدگی کی جانچ آج یعنی منگل کو ہوگی اور نام واپس لینے کی آخری تاریخ 21 نومبر ہے۔ووٹوں کی گنتی نو دسمبر کو ہوگی۔