کانگریس نے اسمبلی میں دھرنا جاری رکھا۔جے ڈی ایس کاایوان سے کا بائیکاٹ ،معاملہ کی جانچ ہائی کورٹ کے جج کے ذریعہ کروانے اور 6وزراء کے استعفوں کا مطالبہ
بنگلورو،24؍مارچ (ایس او نیوز) سابق وزیر رمیش جارکی ہولی کی سیکس سی ڈی معاملہ کی جانچ ہائی کورٹ کے چیف جسٹس کی قیادت میں کروانے کا مطالبہ کرتے ہوئے ریاستی اسمبلی میں کانگریس نے آج بھی ریاستی حکومت کو آڑے ہاتھوں لیا۔ کانگریس آج بھی بضد رہی کہ اس معاملے کی جانچ ہائی کورٹ کے چیف جسٹس کی قیادت میں ہونی چاہئے۔اس مطالبہ کو لے کر کانگریس اراکین نے ایوان کے کنویں میں جا کر دھرنا شروع کردیا۔
اسپیکر نے اپیل کرتے ہوئے کہا کہ دھرنا واپس لینے اور اپنی اپنی کرسیوں پر جا کر بیٹھ جائیں اور ایوان کی کارروائی سہل طریقہ سے چلانے میں تعاون کریں۔ مگر اس اپیل کا اثر کانگریس اراکین کو نہیں ہوا۔ یہ دیکھتے ہوئے اسپیکر نے ایوانی اجلاس کو کل چہارشنبہ صبح 11بجے تک ملتوی کردیا۔ کانگریس نے آج بھی اپنے دھرنے کو جاری رکھتے ہوئے رمیش جارکی ہولی کی سی ڈی معاملہ کی جانچ ہائی کورٹ کے جج کے ذریعہ کروانے کا اور 6وزراء کے استعفوں کا مطالبہ کیا۔متاثرہ لڑکی کے دئے گئے بیان کی بنیاد پر رمیش جارکی ہولی کے خلاف لڑکی پر ظلم کرنے کا معاملہ درج کرنے کا مطالبہ کیا۔ جب کانگریس اراکین نے بار بار کہنے کے باوجود دھرنا واپس نہیں لیا تو اسپیکر ویشویشور ہیگڈے کاگیری نے ایوانی اجلاس کو کل تک ملتوی کردیا۔
کانگریس کے اس دھرنے کے درمیان ہی ریاستی حکومت نے ایوان میں کئی بلوں کو پیش کردیا ہے۔ کانگریس کے دھرنے کے دوران جے ڈی ایس نے اسمبلی اجلاس کا بائیکاٹ کردیا۔