کرناٹکا میں سکینڈ پی یوسی کے نتائج کا اعلان؛ تمام طلبہ کامیاب
بنگلورو 20 جولائی (ایس او نیوز) پی یوسی سال دوم کے نتائج کا منگل کے روز اعلان کر دیا گیا۔ پی یوسی میں زیرتعلیم طلباء میں سے 4,20,406 کوفرسٹ کلاس اور امتیازی زمرے میں پاس قرار دیا گیا ہے ۔ 1,42,056 طلباء سکینڈ کلاس زمرے میں کامیاب قرار دیئے گئے ہیں جبکہ 48,729 طلباءکو جسٹ پاس قرار دیا گیا ہے۔ پی یوایجوکیشن بورڈ کی طرف سے تمام طلباءکو نتائج ایس ایم ایس کے ذریعے روانہ کر دیئے گئے ہیں ۔
ریاستی وزیر برائے بنیادی و ثانوی تعلیم سریش کمار نے ایک اخباری کانفرنس میں پی یوی سال دوم کے نتائج کا اعلان کیا۔ انہوں نے کہا کہ پی یوسی سال دوم کے نتائج کا تعین الگ الگ پیمانوں پر کیا گیا ہے ان میں دوسال قبل ایس ایس ایل سی امتحان میں طلباء کے مظاہرے کے 75 فیصد مارکس اور گزشتہ سال پی یوسی سال اول کے امتحان میں ان کی طرف سے لئے گئے مارکس کے 10 فیصد اوسط کی بنیاد پر ان کو پاس قرار دینے یا درجہ بندی کرنے کا نتیجہ نکالا گیا ہے ۔انہوں نے بتایا کہ رواں سال 6,66,467 طلباء نے حصہ لیا۔ ان تمام کو درجہ بندی کی بنیاد پر پاس قرار دیا گیا ہے ۔ سریش کمار نے کہا کہ یہ پہلا موقع ہے کہ تمام طلباءکو امتحان کے بغیر ہی پاس قرار دیا گیا ہے ۔ انہوں نے بتایا کہ کامرس میں 2,51,686 سائنس میں 2,19,777 اور آرٹس میں 69,259 طلباء نے امتحان لکھا اور تمام کے تمام کو کامیاب قرار دیا گیا ہے ۔ گزشتہ سال کے پی یوسی نتائج کے مقابل رواں سال پاس ہونے والوں کے اوسط میں 33 فیصد کا اضافہ ہوا ہے ۔ سریش کمار نے کہا کہ جوطلبا ءان کو دی گئی گر یڈ نگ سے مطمئن نہیں ہیں وہ امتحان لکھ کر باقاعدہ پاس ہو سکتے ہیں ۔امتحان لکھنے کے خواہشمند طلباءکو 30 جولائی تک اپنا نام درج کروانا ہوگا۔ 19 اگست سے 3 ستمبر 2021 کے درمیان ان کیلئے امتحان کانظم کیا جاۓ گا۔ نتائج کا اعلان پی یوا یجوکیشن بورڈ کی ویب سائٹ: www.pue.kar.nic.in پر کیا گیا ہے۔