وجئے پورہ،22؍جولائی (ایس او نیوز) وجئے پورہ میں 13 نوجوانوں کے ایک گروپ نے 32 سالہ دلت کو اونچی ذات کے حامل شخص کی گاڑی کو مبینہ طور پر چھونے پر برہنہ کر کے پیٹا گیا۔
وجئے پورہ کے ایس پی انوپم اگروال نے صحافیوں کو بتایا کہ متاثرہ دلت (کاشی ناتھ تلوار ) کی شکایت پر ہم نے 13 ؍ ملزمین کے خلاف کیس درج کر کے تحقیقات کا آغاز کردیا ۔ یہ واقعہ 18؍ جولائی کو تالی کوٹی کے قریب مناجگی موضع میں پیش آگیا۔ اگر چیکہ کاشی ناتھ نے دعویٰ کیا کہ اس نے غلطی سے بائیک کو چھولیا اور رحم کی بھیک مانگی تاہم ملزمین نے لاٹھیوں اور جوتوں سے اس کی شدید پٹائی کی اور اس کی پتلون اتاردی۔
اس حملے کا ویڈیو سوشیل میڈیا پر وائر ہوگیا جس کے بعد ضلع میں اونچی ذات کے ملزمین کے خلاف برہمی پیدا ہوگئی کیونکہ متاثرہ شخص کے والدین کی جانب سے مداخلت بھی ملزمین کو نہیں روک سکی تھی۔ ملزمین کے خلاف ایس سی ایس ٹی ایکٹ اور تعزیرات ہند کی متعلقہ دفعات کے تحت کیس درج کر لیا گیا۔
کاشی ناتھ کے والد ینکپا نے یہ الزام بھی عائد کیا کہ جب انہوں نے کاشی ناتھ کو بے رحمی سے پٹائی سے بچانے کی کوشش کی تو ملزمین نے ان پر ، ان کی بیوی اور بیٹی پر بھی حملہ کیا۔ اس سے متعلق ایک اور واقعہ میں گاؤں کی تین عورتوں نے کاشی ناتھ کے خلاف پولیس میں مبینہ چھیڑخوانی اور ان کے سامنے فحش حرکت کرنے کی شکایت درج کروائی ۔ انوپم اگروال نے کہا کہ ہم نے کاشی ناتھ کو پوچھ تاچھ کے لیے طلب کیاہے۔