کارکلا،8؍ نومبر (ایس او نیوز) یہاں ایک اپارٹمنٹ میں مقیم گیتا (68 سال) نامی خاتون جو دو دن پہلے آگ میں جل کر بری طرح زخمی ہوگئی تھی اس نے اسپتال میں دم توڑ دیا جس کے بعد اس کی بیٹی نے آگ لگنے کے معاملہ میں شکوک وشبہات کا اظہار کیا ہے ۔

گیتا کی بیٹی دھنا شری کوڈوا پیشہ سے لیکچرار ہے اور اپنے شوہر کے ساتھ موڈبیدری میں رہتی ہے جب کہ اس کا باپ سریندرا کوڈوا (70 سال) اور اس کی ماں گیتا کنٹا پلاڈی کے ایک اپارٹمنٹ میں ساتھ رہتے تھے ۔ دھنا شری کا کہنا ہے کہ 6 دسمبر کو گیتا کے پڑوسیوں نے اسے اطلاع دی وہ آگ میں بری طرح جل گئی ہے ۔ پڑوسیوں نے اسے اسپتال میں بھی داخل کروایا ۔ یہ خبر ملتے ہی وہ کارکلا پہنچی اور زخموں کی حالت دیکھتے ہوئے گیتا کو بہتر علاج کے لئے منی پال کے اسپتال میں منتقل کیا گیا ۔ لیکن علاج کارگر نہیں ہوا اور گیتا نے 7دسمبر کو زخموں کی تاب نہ لاتے ہوئے دم توڑ دیا ۔

گیتا کی موت واقع ہونے پر دھنا شری نے پولیس کو اطلاع دی کہ اسے آگ لگنے اور گیتا کے زخمی ہونے کے معاملے میں شک ہے کہ کہِیں اس کے پیچھے کوئی اور بات نہ ہو ۔ کیونکہ اسے گیتا کے پڑوسیوں نے بتایا تھا کہ جب گیتا پوری طرح آگ کے شعلوں میں گھری ہوئی تھی تو اس کا باپ گیتا کو بچانے کے لئے کوئی کوشش نہیں کررہا تھا بلکہ دور کھڑے ہو کر خاموش تماشائی کی طرح اسے جلتے ہوئے دیکھ رہا تھا ۔ اس لئے اسے محسوس ہورہا ہے کہ اس واقعہ میں کچھ نہ کچھ دال میں کالا ضرور ہے ۔

دھنا شری کی شکایت پر کارکلا پولیس نے کیس درج کرلیا اور اس معاملہ کی تفتیش کررہی ہے ۔