بنگلورو،31؍اکتوبر(ایس او نیوز) کنڑا سینا کے صدر کے آر کمار نے بتایا کہ سینا کے زیر اہتمام 64واں کنڑا راجیہ اتسوا اور کنڑا جاگرتی سمیلن 31اکتوبر کی شام 4بجے منڈیا کے کرشنا راج وڈیر کلا مندر میں منعقد کیا جائے گا- اخباری نمائندوں سے بات کرتے ہوئے انہوں نے بتایا کہ اس مرتبہ الگ انداز میں عالیشان پیمانے پر کنڑا راجیہ اتسوا تقریب منائی جائے گی اور شہر سے منڈیا تک جاگرتی ریلی نکالی جارہی ہے- انہوں نے بتایا کہ ریلی میں بڑی تعداد میں کنڑا نواز تنظیموں کے عہدیدار اور کارکن شرکت کریں گے- کے آر کمار نے کہا کہ 31/اکتوبر کی صبح 7:30 بجے ملیشورم سرکل پر نائب وزیر اعلیٰ ڈاکٹر اشوتھ نارائن ریلی کو ہری جھنڈی دکھائیں گے- انہوں نے کہا کہ ریلی آنجہانی ڈاکٹر راجکمار کی سمادی پر پہنچے گی جہاں انہیں خراج عقیدت پیش کیا جائے گا- انہوں نے بتایا کہ جاگرتی ریلی کینگیری، بڑڈی، رام نگرم، چن پٹن، مدور ہوتے ہوئے منڈیا پہنچے گی- ریلی میں فنکاروں کی ٹیمیں بھی شامل رہیں گی- انہوں نے بتایا کہ 31/اکتوبر کی شام 4بجے ریاستی وزیر سی ٹی روی راجیہ اتسوا اور کنڑا جاگرتی سمیلن کا افتتاح کریں گے- مہمانان خصوصی کے طور پر کنڑا چلولی واٹال پارٹی کے سربراہ وسابق رکن اسمبلی واٹال ناگراج، کنڑا فلم اینڈ چیمبر آف کامرس کے سابق صدر سارا گووند، رکن اسمبلی وسابق وزیر ڈی سی تمنا شرکت کریں گے- انہوں نے بتایا کہ تقریب کی صدارت رکن کونسل ایچ ڈی چوڈیا کریں گے- تقریب کے دوران 12افراد کو ”کنڑا رتنا“ ایوارڈ سے نوازا جائے گا- اخباری کانفرنس میں سینا کے ریاستی جنرل سکریٹری ایم منے گوڈا سمیت دیگر عہدیدارن حاضر تھے-