بھٹکل 17/ فروری (ایس او نیوز)بھٹکل تعلقہ کے ویوسائی سیوا سہکاری سنگھا لمیٹیڈ کے ڈائریکٹرز کے لئے ہوئے انتخاب میں سابق ایم ایل اے منکال وئیدیا اور ان کے تمام حامیوں کو زبردست جیت حاصل ہوئی ہے اور سبھی 12 ڈائرکٹرس دوبارہ جیت کر آگئے ہیں  ان کی جیت کے ساتھ ہی حالیہ رکن اسمبلی کو زبردست خفت کا سامنا کرنا پڑا ہے، جو  انتخابات کے دوران خود موقع پر موجود تھے اور ان کے کافی حامی پولنگ بوتھ کے باہر جمع تھے۔ لیکن اُن کے ایک اُمیدوار کو بھی کامیابی نہیں مل سکی۔

 انتخابی  نتائج کا اعلان ہوتے ہی اخباری نمائندوں سے بات چیت کرتے ہوئے منکال وئیدیا نے کہا کہ کسی مالیاتی ادارے کو قائم کرنے، اسے ترقی دینے اور اس کو بچائے رکھنے میں اس ادارے کے شیئر ہولڈرس کا بڑااہم رول ہوتا ہے۔انہوں نے اس سمت میں اہم ترین ذمہ داری اب ہمیں سونپی ہے۔ انہوں نے مزید یہ بھی کہا کہ انتخابی عمل کے دوران کس طرح تشدد کو ہوا دی گئی تھی، اس کا نظارہ سب لوگوں نے کیا ہے۔عہدیدارو ں کو معطل کیا گیا تھا۔ غیر قانونی طورپر ایڈمنسٹریٹر کو نامزدکیا گیا تھا۔لیکن عدالت نے ان سب کارروائیوں پر روک لگادی تھی۔لوگوں کو یہ بات یاد رکھنی چاہیے کہ عہدے اور اختیارات دائمی نہیں ہوتے ہیں۔اب شیئر ہولڈرس نے اپنا فیصلہ سنادیا ہے۔اس فیصلے کو خوش دلی کے ساتھ سب کو قبول کرنا چاہیے۔ غریب شیئر ہولڈرس کو اس سنگھا سے کیا فائدے ہوسکتے ہیں اوراس ادارے کی ترقی کے لئے جو کچھ بھی ممکن ہے ہم وہ تمام چیزیں کرنے کے لئے تیار ہیں۔

خیال رہے کہ انتخابات کےدوران  دو سیاسی حریف لیڈران اور اُن کے کارکنوں کے درمیان  کافی  تکرار اور بحث مباحثے بھی ہوئے، جس کی وجہ سے کافی وقت تک ماحول کشیدہ رہا اور  انتخابات کے دوران  عوام میں کافی تشویش دیکھی گئی،   لیکن بھٹکل ڈی وائی ایس پی  گوتم، سرکل پولس انسپکٹر پرکاش سمیت پولس کی زائد فورس پہلے سے ہی  جائے وقوع پر موجود تھی، جنہوں نے دو سیاسی  کارکنوں کی زبانی جھڑپوں کو  ہاتھاپائی تک پہنچنے کا موقع نہیں دیا اور حالات کو سنبھالے رکھا۔