جوئیڈا12؍اپریل (ایس او نیوز) پارلیمانی انتخابات کے پس منظر میں جوئیڈا تعلقہ کے باپیلی کراس پر جو چیک پوسٹ قائم کیا گیاہے وہاں پر سی سی کیمروں کی نظر سے بچ کر خود پولیس والوں کی طرف سے غیرقانونی طور پر رقم وصول کیے جانے کی شکایات موصول ہونے کے بعد انتخابات کی نگرانی کی ذمہ دار آفیسر نے اس چیک پوسٹ پر پہنچ کر تحقیقات کی ہے اور پولیس کوانتخابی ضابطہ اخلاق پر سختی کے ساتھ عمل درآمد کرنے کی ہدایات دی ہیں۔

موصولہ رپورٹ کے مطابق انتخابات کی نگرانی پر مامور افسران کو اس بات کی شکایات ملی تھیں کہ باپیلی چیک پوسٹ پر موٹر گاڑیوں کو روک کر تلاشی لینے کے نام پر ہراساں کیا جارہا ہے۔ موٹر بائک پر سفر کرنے والے نوجوان لڑکوں اور لڑکیوں کو خواہ مخواہ بڑی دیر تک یہاں روک لیا جاتا ہے ۔ ٹرک ڈرائیوروں سے رشوت وصول کی جاتی ہے۔ اس کے علاوہ جوئیڈا کے درگاہ دیوی مندر جاترا کے نام پر پولیس کے ذریعے ہی عطیہ کی رقم وصول کرکے رسیدیں تھمائی جارہی ہیں۔

ان شکایات کے پس منظر میں انتخابات کی نگرانی پر مامور آفیسردین دیال منگل نے اس چیک پوسٹ پر پہنچ کر معائنہ کیا اور موصولہ شکایات کے سلسلے میں چیک پوسٹ پر تعینات محکمہ پولیس اور دیگر محکمہ جات سے متعلقہ افسران سے تقریباً آدھے گھنٹے تک تحقیقات کیں۔انتخابی نگراں افسر نے کیا رپورٹ تیار کی ہے اور کس قسم کا اقدام کیا جانے والا ہے اس تعلق سے کوئی بات معلوم نہیں ہوئی ہے۔

خیال رہے کہ غیر قانونی سرگرمیوں پر قابو پانے کی ذمہ دار پولیس کی طرف سے ہی جوئیڈا تعلقہ میں بہت ساری غیر قانونی سرگرمیاں چلائے جانے کی خبریں حال کے کچھ دنوں میں عوام کے سامنے آچکی ہیں۔جس میں گروراج نامی پولیس کانسٹیبل کے سرکاری گھر سے قیمتی لکڑیوں کا غیر قانونی ذخیرہ بر آمد ہونے کا بڑا معاملہ بھی شامل ہے۔اب جوئیڈا پولیس کی نگرانی میں ہی درگادیوی جاترا منائے جانے اور پولیس کی طرف سے ہی اس تہوارکے لئے عوام سے عطیہ جات وصول کیے جانے کی بات سامنے آئی ہے۔ اس کے علاوہ سرکار کی طرف سے جو فنڈ موصول ہوا ہے اس میں بھی لاکھوں روپے کی ہیرا پھیری کی باتیں سننے میں آرہی ہیں۔عوام مطالبہ کررہے ہیں کہ جوئیڈا میں چل رہی پولیس کی غیر قانونی سرگرمیوں کی تحقیقات ڈپٹی کمشنر اور پولیس سپرنٹنڈنٹ کی طرف سے ہونی چاہیے اور خاطی افسران کو کڑی سزادینے کے ساتھ ساتھ آئندہ اس قسم کی سرگرمیوں پر پوری طرح روک لگادینی چاہیے۔