اعلیٰ ا مریکی طبی مشیرکا مشورہ ؛ ہندوستان میں چند ہفتوں کے مکمل لاک ڈاؤن کی ضرورت ، ہندوستان میں صرف 2فیصد ٹیکہ کاری ہوئی، فتح کاجشن جلدمنالیاگیا
واشنگٹن،2/ مئی(ایس او نیوز/ایجنسی)ہر نئے دن کورونا مریضوں کے جو نئے اعداد و شمار آ رہے ہیں، اس سے پورے ملک میں خوف کا ماحول ہے۔ ایسے میں عوام سے لے کر حکو مت تک اس کو لے کر فکرمند ہے کہ اس وبا کو کیسے روکا جائے، اس کی شدت کو کیسے کم کیا جائے۔ امریکی صدر جو بائیڈن کے مشیر اور کورونا وائرس پر کام کرنے والوں میں ایک معتبر نام ڈاکٹر فاؤچی نے ہندوستان کو مشورہ دیا ہے کہ وہ کچھ فوری اور کچھ لمبے وقفہ کے منصوبوں پر عمل کرے۔
انگریزی اخبار انڈین ایکسپریس سے بات چیت کرتے ہوئے انہوں نے مشورہ دیا ہے کہ پورے ملک میں کچھ ہفتوں کیلئے لاک ڈاؤن نافذ کیا جائے۔ انہوں نے کہا ہے کہ 3 اسٹیپس پر یعنی 3 مراحل پر کام کرنے کی ضرورت ہے۔انہوں نے کہا کہ اس وقت ہندوستانی عوام کو ٹیکہ لگایا جانا بہت ضروری ہے، ساتھ میں آکسیجن و دیگر طبی سہولیات کی فراہمی کیلئے کمیشن یا ایمرجنسی گروپ بنانے کی ضرورت ہے۔
ڈاکٹر فاؤچی نے کہا کہ یہ منصوبہ بنایا جائے کہ آکسیجن کیسے حاصل کی جائے، کیسے سپلائی کی جائے، کیسے دوائیں دستیاب کرائی جائیں۔ انہوں نے کہا کہ ہندوستان کو عالمی طبی تنظیموں اور دیگر ممالک سے مشورہ کرنے کی ضرورت ہے۔انہوں نے گفتگو کے دوران یہ بھی کہا کہ جیسے جنگ کے دوران عارضی ماڈل اسپتال بنائے جاتے ہیں ایسے اسپتال بنانے کی ضرورت ہے۔ڈاکٹر فاؤچی نے چین کی مثال دیتے ہوئے امریکہ کے تجربات کا بھی ذکر کیا۔انہوں نے اس بات پر بہت زور دیاکہ عوام کو ٹیکہ لگایا جانا چاہئے۔ انہوں نے کہا کہ پہلے فوری حالات کو سمجھیں پھر منصوبہ بندی کریں۔ لاک ڈاؤن کو ضروری بتاتے ہوئے انہوں نے کہا کہ ہندوستان کو6 ماہ کیلئے لاک ڈاؤن کی ضرورت نہیں ہے لیکن وائرس کے پھیلاؤ کو روکنے کیلئے عارضی لاک ڈاؤن کی ضرورت ہے اور اس کیلئے کچھ ہفتوں کیلئے ملک گیر لاک ڈاؤن نافذ کیا جائے۔
ہندوستانی وزیر اعظم نریندر مودی قوم سے خطاب میں کہہ چکے ہیں کہ لاک ڈاؤن کو آخری متبادل کے طور پر لینا چاہئے جس کا سیدھا مطلب ہے کہ وہ ملک گیر لاک ڈاؤن کے حق میں نہیں ہیں۔ واضح رہے کہ گزشتہ سال جب ملک میں کورونا کے معاملہ زیادہ نہیں تھے تو اس وقت وزیر اعظم نے کسی کو سنبھلنے اور حالات کو سمجھنے کا موقع بھی نہیں دیا تھا اور لاک ڈاؤن نافذ کر دیا تھا لیکن اس مرتبہ وہ ایسا کرنے سے بچ رہے ہیں اور یہی وجہ ہے کہ بی جے پی کی اقتدار والی ریاستوں میں کرناٹک کو چھوڑ دیں تو کسی بھی ریاست نے ابھی مکمل لاک ڈاؤن نافذ نہیں کیا ہے۔ ایسے میں کورونا وائرس پرکام کرنیوالے ماہر ڈاکٹر فاؤچی کے مشوروں کا کیا ہوگا؟