نئی دہلی 17جون (ایس او نیوز/آئی این ایس انڈیا) دہلی میں واقع وزیر اعلی نتیش کمار کے گھر اتوار کو جے ڈی یو کی میٹنگ ہوئی۔ میٹنگ میں آنے والے دنوں میں ہونے والے جھارکھنڈ اسمبلی انتخابات کو لے کر حکمت عملی تیار کی گئی ہے۔ جھارکھنڈ میں جے ڈی یو نے اکیلے چناؤ لڑنے کا فیصلہ کیا ہے۔ میٹنگ میں پارٹی کے قومی صدر نتیش کمار، نائب صدر پرشانت کشور، سی تیاگی سمیت کئی لیڈر موجود تھے۔گزشتہ دنوں ہوئی جے ڈی یو کے قومی مجلس عاملہ کی میٹنگ میں پارٹی نے یہ فیصلہ کیا ہے کہ چار ریاستوں میں وہ اکیلے اسمبلی انتخابات لڑے گی۔ آنے والے وقت میں جھارکھنڈ، دہلی، ہریانہ اور جموں و کشمیر میں انتخابات ہونا ہے۔ ناگالینڈ اور اروناچل اسمبلی انتخابات میں کامیابی کے بعد جے ڈی یو نے یہ حکمت عملی بنائی ہے کہ ریاستوں میں وہ اکیلے انتخابی میدان میں اترے گی۔ اجلاس کے بعد بہار حکومت میں وزیر اور جھارکھنڈ جے ڈی یو کے انچارج رام سیوک سنگھ نے بتایا کہ نشستوں اور امیدواروں کے انتخاب کو لے گفتگو ہوئی ہے۔ ایک ماہ کے اندر نشستوں اور امیدواروں کو منتخب کر لیا جائے گا۔ امیدواروں کے انتخاب کے بعد آگے کی حکمت عملی تیار کی جائے گی۔ بی جے پی کے ساتھ اتحاد کو لے کر جے ڈی یو لیڈر نے کہا کہ ہمارا اتحاد صرف بہار میں ہے۔ دوسری ریاستوں میں ہمارا اتحاد نہیں رہے گا۔انہوں نے کہا کہ اکیلے الیکشن لڑنے پر بی جے پی-جے ڈی یو کے تعلقات پر کوئی خاص فرق نہیں پڑے گا۔