دیوے گوڈا نے بی جے پی کی حمایت کا واضح اشارہ دیا ضمنی انتخاب بی جے پی ہار بھی گئی تو حکومت کو خطرہ نہیں
بنگلورو،12؍نومبر(ایس او نیوز) ریاست میں ایک او ر بار بی جے پی اور جے ڈی ایس کے درمیان مفاہمت کے واضح اشارے دیتے ہوئے سابق وزیر اعظم اور جے ڈی ایس سربراہ ایچ ڈی دیوے گوڈا نے کہا ہے کہ ضمنی انتخابا ت کا نتیجہ جو بھی ہو لیکن ریاست میں بی جے پی حکومت کے استحکام کو متاثرہونے نہیں دیا جائے گا۔ انہوں نے کہا ہے کہ ضمنی انتخابات کے بعد بی جے پی حکومت کو کسی بھی طرح کے خطرے کا کوئی امکان نہیں۔ ریاستی اسمبلی کے اپوزیشن لیڈر سدارامیا کے اس دعوے پر کہ ضمنی انتخابات میں کانگریس زیادہ سیٹوں پر کامیابی حاصل کرے گی اور بی جے پی حکومت کا گرنا طے ہے دیوے گوڈا نے کہا کہ ایسی صورت میں بھی بی جے پی حکومت مستحکم رہے گی۔ ریاست کی بدلی ہوئی سیاسی صورتحال میں دیوے گوڈا اور کمارسوامی نے جس طرح بی جے پی کے تئیں ہمدردی ظاہر کرنے کا سلسلہ شروع کیا ہے اسے دیکھتے ہوئے اس امکان کو خارج نہیں کیا جا سکتا کہ ضمنی انتخابات میں اگر بی جے پی کا مظاہرہ ناقص رہا تو جے ڈی ایس اس حکومت کو بچانے میں کلیدی رول ادا کرسکتی ہے۔ ریاست میں وسط مدتی انتخاب کے امکان کو مسترد کرتے ہوئے انہوں نے کہا کہ جن15اسمبلی حلقوں میں ضمنی انتخابات ہونے جا رہے ہیں وہاں پارٹی کی طرف سے امیدوار کھڑے کئے جائیں گے لیکن پانچ حلقوں میں جے ڈی ایس کا مقا بلہ انتہائی سنجیدہ اور جیت کے لئے ہوگا۔ باقی دس حلقوں میں پارٹی اپنے وجود کے لئے امیدوار میدان میں اتارے گی۔ انہوں نے کہا کہ ریاست بھر میں وہ پارٹی کو مضبوط کرنے کے لئے متحرک ہیں۔ انہوں نے اس امکان کو بھی مسترد کردیا کہ صمنی انتخابات میں اگر بی جے پی کو اکثر یت نہ مل سکی تو دوبارہ کانگریس اور جے ڈی ایس کے درمیا ن اتحاد ہو سکتا ہے۔انہوں نے کہا کہ بار بار دھوکہ کھانے کے بعد اب کانگریس کے ساتھ کسی بھی طرح کی مفاہمت کا سوال ہی نہیں اٹھتا۔