کاروار:05؍اپریل (ایس او نیوز) منظور کردہ راستے سے نہ جاتے ہوئے جے ڈی ایس کی ریلی دوسری سڑک سے گزرنے پر جے ڈی ایس کارکن پرکاش نائک کے خلاف کیس درج کرلیا گیا ہے۔

جے ڈی ایس اور کانگریس کے مشترکہ امیدوار آننداسنوٹیکر پرچہ نامزدگی سے قبل نکلی ریلی طئے شدہ راستے کے بجائے دوسرے  راستے سے جانے پر کیس داخل ہواہے۔ الیکشن فلائنگ اسکواڈ کے افسر شیورام گاؤنکر نے جے ڈی ایس کارکن پرکاش نائک کے خلاف اسسٹنٹ الیکشن کمشنر کو شکایت سونپی تھی ۔ جس پر دفعہ 200کے تحت کیس درج کرلیاگیا ہے۔ شکایت کے متعلق سنوائی کے لئے فرسٹ سول کورٹ کے جج کو شکایت نامہ بھیجا گیا ہے۔

دراصل 4اپریل کو امیدوار آنندا سنوٹیکر کے پرچہ نامزدگی کے متعلق الیکشن کمیشن سے اجازت لی گئی تھی جس کے تحت ڈا ئس پروگرام کے بعد مالادیوی میدان سے ڈی سی دفتر تک ریلی کی منظوری دی گئی تھی۔ جے ڈی ایس کارکن پرکاش نائک نے شرائط کو مانتے ہوئے منظوری حاصل کی تھی ۔ جس کے مطابق ریلی سویتا سرکل ، سبھاش سرکل ، گرین اسٹریٹ ، امبیڈکر سرکل ، بلدیہ گارڈن، ڈی سی دفتر پہنچنا تھا۔ مگر ریلی مالادیوی میدان سے نکل کر پکلے روڈ سے ہوتے ہوئے ڈی سی دفتر پہنچی۔ اس کے علاوہ وزیر اعلیٰ کمار سوامی سمیت دیگر لیڈران ڈی سی دفتر سے متصل پتریکابھون اور محکمہ آب پاشی کے رہائشی کامپلکس کے درمیان سے چلتے ہوئے  ڈی سی دفتر  پہنچے تھے۔ انہی وجوہات کی بنا پر کیس درج کرلیاگیا ہے۔