موقع پرست جے ڈی ایس، آر ایس ایس سے ہاتھ ملا سکتی ہے: سدارامیا
نوجوانوں کو منشیات کا عادی بنا کر برسراقتدار آنے والی بی جے پی نے عوام کو قرضے میں ڈبودیا ہے
بنگلورو،20؍ستمبر(ایس او نیوز) جنتادل (سکیولر) ایک موقع پرست پارٹی ہے۔ بشمول دیوے گوڈا سینکڑوں لیڈر کانگریس چھوڑ کر جنتادل اور دیگر پارٹیوں میں شامل ہوئے ہیں۔ اپوزیشن لیڈر سدارامیا نے یہ بیان دے کر پرانے زخموں کو تازہ کردیا ہے۔
کے پی سی سی دفتر میں سابق ایم ایل سی رمیش بابو کی کانگریس میں شمولیت کے موقع پر میڈیا سے بات کرتے ہوئے سدارامیا نے کہا کہ دیوے گوڈا کانگریس ہی سے تعلقہ پنچایت کے لئے رکن منتخب ہوئے تھے۔اس کے بعد انہیں ٹکٹ نہ ملنے کی وجہ سے انہوں نے آزاد امیدوار کی حیثیت سے چناؤ لڑا۔
انہوں نے کہاکہ رام کرشنا ہیگڈے بھی کانگریس ہی میں تھے۔ اس ملک میں کانگریس ہی ایک پارٹی ہے جس نے صرف اقتدار کے لئے جدوجہد نہیں کی۔ کانگریس نے ہمیشہ سماج میں تبدیلی کی خاطر جدوجہد کی۔ بڑے بڑے انقلابی لیڈر کانگریس ہی کی پیداوار ہیں۔کانگریس محض سیاسی پارٹی نہیں۔کانگریس نے ہمیشہ سماج میں سدھار لانے کی کوشش کی ہے۔ ہندوتوا جیسے افیوم کو نوجوانوں میں عام کرکے بی جے پی اقتدار پر آئی ہے۔
وزیراعظم نریندر مودی کی سالگرہ کے دن ہی ملک بھر میں یوم بے روزگار منایاگیا۔ مودی نے اس ملک کی معیشت کوتباہ کردیاہے۔ اس ملک کی معیشت کو تباہ کرنے کے لے مودی ہی ذمہ دار ہیں۔مودی نے جتنے وعدے کئے تھے اس میں سے ایک بھی پورا نہیں کیا۔ اس ملک کے نوجوانوں کو بے روزگاری کے دہانے پر کھڑا کرنے والی بی جے پی حکومت کو سدارامیا نے آڑے ہاتھوں لیا۔
ریاستی حکومت کی دین: انہوں نے کہا کہ ریاستی حکومت نے پچھلے ایک سال میں ریاست کو بڑا قرضدار بنادیا ہے۔ اس وقت ریاست کرناٹک پر ڈیڑھ لاکھ کروڑ روپئے سے زیادہ قرضے کا بوجھ ہے۔ سرکاری خزانہ خالی پڑا ہے۔ اس لئے ترقیاتی کام رکے ہوئے ہیں۔ بھاری قرضہ کی وجہ سے کرناٹک پر دن بدن سود کا بوجھ بڑھ رہا ہے۔انہوں نے دعویٰ کیا کہ پچھلی کانگریس حکومت نے اپنے دور میں معیشت کاتحفظ کیا تھا۔ لیکن بی جے پی حکومت کے دور اقتدار میں معیشت درہم برہم ہوگئی ہے۔اب ایڈی یورپا دہلی سے خالی ہاتھ لوٹ آئے ہیں۔اب ایک سال میں ایڈی یورپا حکومت مزید ایک لاکھ کروڑ روپئے کا قرضہ بڑھا کر ریاست کے عوام پر بوجھ ڈالے گی۔اس کے لئے ذمہ دار کون اور یہ قرضہ کیسے ادا کیا جائے گا؟ اگر بی جے پی حکومت نے پورے پانچ سال مکمل کئے تو کرناٹک قرضے میں ڈوب جائے گا۔سدارامیا نے مزید کہاکہ جے ڈی ایس، آر ایس ایس کے ساتھ بھی ہاتھ ملا سکتی ہے۔
