بنگلورو،23؍نومبر(ایس او   نیوز) کرناٹک میں ایک لوک سبھا اور دو اسمبلی حلقو ں کے لئے عنقریب ضمنی انتخابات ہونے والے ہیں، ان کے لئے کانگریس اور بی جے پی کی طرف سے جہاں تیاری تیزی سے جاری ہے وہیں ریاست میں تیسری سیاسی قوت کے طور پر ابھر نے میں پچھلے چند دنوں سے ناکام جنتا دل (سکیولر) نے ان انتخابات میں اپنے امیدوار نہ اتارنے کا فیصلہ کیا ہے۔ یہ اعلان اتوار کے روز سابق وزیر اعلیٰ ایچ ڈی کمارسوامی نے کیا۔

انہوں نے کہا کہ پارٹی نے طے کیا ہے کہ وہ اپنے آپ کو ان انتخابات سے دور رکھے،اس لئے بیلگاوی لوک سبھا حلقہ،رائچور ضلع کے مسکی اور بیدر ضلع کے بسوا کلیان حلقوں سے جے ڈی ایس نے اپنے امیدواروں کو کھڑا نہ کرنے کا فیصلہ کیا ہے۔ انہوں نے کہا کہ ان تینوں حلقوں میں انتخاب لڑنے سے جے ڈی ایس کو کوئی فائدہ نہیں ہو گا۔ اس لئے جلد ہی پارٹی کی قیاد ت کی طرف سے اس سلسلہ میں باضابطہ اعلان کیا جائے گا۔ حال ہی میں سرا اور بنگلورو کے راجا راجیشوری نگر اسمبلی حلقوں کے ضمنی انتخابات میں جے ڈی ایس نے اپنے امیدواروں کو میدا ن میں اتارا تھا، لیکن دونوں حلقوں میں پارٹی کو رسوا کن شکست کا سامنا کرنا پڑا۔ راجا راجیشوری نگر میں جے ڈی ایس امیدوار اپنا ڈپازٹ بھی نہ بچا سکے۔ اس لئے جے ڈی ایس قیادت نے طے کیا ہے کہ وہ آئندہ صرف ان حلقوں پر توجہ دے گی جہاں اس کی کامیابی کا امکان ہو۔راجا راجیشور ی نگر اسمبلی حلقہ میں جے ڈی ایس کی شکست پر حیرت ظاہر کرتے ہوئے انہوں نے کہا کہ بحیثیت وزیر اعلیٰ انہوں نے اس حلقہ میں بارش کے سبب عوام کو ہونے والی دشواری کو دیکھتے ہوئے بڑے نالوں پر غیر قانونی قبضہ جات ختم کروائے۔ اس کا شکریہ ادا کرنے کے لئے یہاں کے لوگوں نے ان پر ہیلی کاپٹر سے پھول برسائے، لیکن افسوس کے وہی لوگ اس بار بی جے پی کے حق میں کھڑے ہوئے ہیں۔ انہوں نے کہا کہ لوگ ان لوگوں کو اب ووٹ نہیں دے رہے ہیں جو ان کی فلاح و بہبود کے لئے کام کرنا چاہتے ہیں، بلکہ ان لوگوں کو ووٹ دیا جا رہا ہے جو ان کو لوٹتے ہیں۔