منڈگوڈ:09؍اپریل (ایس او نیوز) ذات پات کی نفرتوں کے بیج بوتے ہیں ، ہندودھرم کی بنیاد پر فرقہ وارانہ فسادات برپا کرکے سیاست کرتے ہیں ، جب انتخابات قریب آتے ہیں تو صرف اسی وقت حلقہ میں گھومتے پھرتے ہیں۔ شمالی کینرا کے کانگریس ۔ جے ڈی ایس امیدوار آنند اسنوٹیکر نے بی جے پی امیدوار اننت کمارہیگڈے کے خلاف انتخابی وار کیا۔
تعلقہ کے کاتور دیہات میں کانگریس اور جے ڈی ایس کارکنان کو مخاطب کرتے ہوئے اسنوٹیکر نے کہاکہ کانگریس پارٹی میرے لئے ریڑھ کی ہڈی ہے، ضلع میں جاری ظلم کے خلاف گزشتہ ایک برس سے جدوجہد کرنے کی بات کہی۔ انہوں نے عوام سے سوالیہ انداز میں کہاکہ جن کو دھرم کی رکشھا کرنی ہے انہیں سیاست کی ضرورت ہی کیاہے؟ کسی مٹھ میں بیٹھ سکتے ہیں؟ ۔ دھرم کو صحیح ہوناہے تو معاشی حالات میں سدھار آنا ضروری ہے ، اس کے لئے نوجوانوں کو روزگارکے مواقع فراہم کرنا چاہئے۔ بندر، کارخانے ، صنعت کاری کاقیام ہو۔ ہمارے ضلع میں جتنی غریبی ہے اتنی کسی اور ضلع میں نہیں ہے۔ مجھے اننت کمار کی تنقید کرنے کی ضرورت نہیں ہے ، لیکن حالات کچھ ایسے ہیں۔ وہ ایک غیر متحرک وزیر ہے، مرکز کی کسی بھی امداد کو صحیح طورپر استعمال نہیں ہوا۔ ضلع کے سلگتے مسائل پر پارلیمنٹ میں بات نہیں کی ، البتہ معافی مانگنے کا موقع ضرور ملا ہے۔ انہوں نے کہاکہ ضلع میں تبدیلی ضروری ہے ، منڈگوڈ کانگریس کا ایک مضبوط قلعہ ہے اس لئے آپ سے میں ایک موقع دینے کا مطالبہ کرتاہوں۔
رکن اسمبلی شیورام ہیبار نے خطاب کرتےہوئے کہاکہ آزادی کے بعد پہلی مرتبہ ہاتھ کے نشان کے بغیر انتخابات ہورہے ہیں، قومی لیڈران کے حکم کے مطابق مشترکہ طورپر راہول گاندھی کی قیادت میں اقتدار کے لئے ووٹ مانگ رہے ہیں، اسی لئے ہم عوام سے اپیل کرتے ہیں کہ وہ ہمارے مشترکہ امیدوار کو کامیابی دلائیں۔ اس موقع پر جے ڈی ایس کے ریاستی سکریٹری مناف مرجانکر، ضلع صدر بی آر نائک، ارون کمار گوندلے ، ملیکارجن کوٹری، روی گوڈا پاٹل ، جئیما ہیریہلی ، کرشنا ، ایچ ایم نائک وغیرہ موجود تھے۔ تعلقہ کے پالا، ہنگند دیہات میں عوام سے ووٹ دینےکی اپیل کی۔