کاروار: بھٹکل کی جئے شری موگیر کو ضلع پنچایت کے عہدے سے ہٹانے دلت سنگھرش سمیتی کا مطالبہ
کاروار 6/ نومبر (ایس او نیوز) دلت سنگھرش سمیتی کے ضلع صدردیپک کوڈالکر نے مطالبہ کیا ہے کہ موگیر سماج کے پچھڑے طبقے سے تعلق رکھنے کا جھوٹا سرٹیفیکیٹ پیش کرکے ضلع پنچایت صدر کے عہدے پر براجمان ہونے والی جئے شری موگیر کوان کے عہدے سے برخاست کردیا جائے۔
کاروار کے ضلع پتریکا بھون میں منعقدہ ایک پریس کانفرنس سے خطاب کرتے ہوئے دیپک نے کہا کہ پچھڑی ذات سے تعلق رکھنے کی جھوٹی سند پیش کرکے غیر پسماندہ طبقات کے لوگ حقیقی طور پر پچھڑے ہوئے دلتوں کو ملنے والی سرکاری سہولتوں کا ناجائز فائدہ اٹھا رہے ہیں۔شمالی کینرا ضلع پنچایت صدر جئے شری موگیر کا تعلق پچھڑی ذات سے نہیں ہے۔ اپنے جھوٹے سرٹیفیکیٹ کو درست ثابت کرنے کے لئے وہ سپریم کورٹ کا وقت ضائع کررہی ہیں۔ انہیں فوری طور پر برخاست کیا جانا چاہیے۔موگیر سماج کو کسی بھی قیمت پر پچھڑی ذات کی سند جاری نہیں کرنا چاہیے۔اگر یہ سلسلہ یونہی چلتا رہا تو پھر جلد ہی دلت سماج کی طرف سے متحدہ عوامی احتجاج شروع کیا جائے گا۔
یہاں یہ بات یاد دلانا ضروری ہے کہ بھٹکل سے تعلق رکھنے والی جئے شری موگیر کو تحصیلدار کی طرف سے پچھڑی ذات کا سرٹفکیٹ جاری کیا گیا تھا جس کی بنیاد پر وہ پچھڑی ذات کے لئے مختص کیے گئے ضلع پنچایت صدر کے عہدے پر فائز ہوئی تھیں۔ تب سے یہ معاملہ عدالتوں میں چل رہا ہے۔ کچھ عرصہ پہلے تعلقہ انتظامیہ کی طرف سے اس سرٹفکیٹ کو منسوخ کرنے کا فیصلہ بھی کیا گیا تھا۔ لیکن جئے شری موگیر نے اس معاملے کو سپریم کورٹ تک لے گئی جس کی وجہ سے وہ تاحال اپنے عہدے پر بحال ہیں۔ لیکن دلت سماج کی طرف سے بار بار ان کی برخاستگی کا مطالبہ سامنے آتا رہتا ہے۔
پریس کانفرنس کے موقع پر دلت لیڈر گھارو مانگرے، ڈونڈپّا بنڈی وڈّر، سچن بورکر وغیرہ موجود تھے۔
