ریاست کرناٹک کے ہر ضلع میں پانی کا مسئلہ حل کرنے جے ڈی ایس کا ”جنتاجلادھارے“ انوکھاابھیان
کولار، 11؍جنوری (ایس او نیوز)ریاست کرناٹک کے ہر ضلع میں پانی کا مسئلہ حل کرنے مقصد سے ریاست میں بہہ رہی ندیوں میں دستیاب پانی کااستعمال کرنے کیلئے”جنتاجلادھارے“نامی انوکھا ابھیان سابق وزیر اعظم ایچ ڈی دیوے گوڈااور سابق وزیر اعلیٰ ایچ ڈی کمار سوامی کی قیادت میں شروع کیاگیاہے۔یہ بات رکن قانون ساز کونسل گووند راجو نے کہی۔
انہوں نے یہاں اپنی رہائش گاہ پر اخباری نمائندوں سے خطاب کرتے ہوئے کہا کہ جنتا جلا دھارے ابھیان کے ذریعے ریاست کی 34ندیوں سے پانی کا استعمال کرکے ہر گھر کو پینے کا شفاف پانی فراہم کرنے اور زرعی سرگرمیوں کیلئے آبپاشی کی سہولت فراہم کرنے کا منصوبہ بنایاجائے گا۔رکن کونسل نے کہاکہ میکے داٹو منصوبے کے نفاذ کا مطالبہ کرتے ہوئے کانگریس پارٹی کی طرف سے جو پدیاترا نکالی گئی ہے،اس کیلئے یہ وقت موزوں نہیں ہے۔پد یاترا سے کوئی فائدہ نہیں ہوگا۔منصوبے کے نفاذ کے معاملے میں پائی جارہی قانونی رکاوٹوں کو دور کرنے کیلئے جدوجہد کی جانی چاہئے،اس معاملے میں مرکزی وریاستی حکومت کو بھی اقدامات کرنے ہوں گے۔
رکن کونسل نے مزید کہاکہ یرگول منصوبہ کمار سوامی کی دین ہے،اس منصوبے کے تحت چار تعلقوں کو پینے کا پانی فراہم ہونے والاہے،یرگول منصوبے کے تعمیری کام جلد مکمل کئے جائیں۔ایتناہولے منصوبے کا تعمیری کام بھی ڈیم کی تعمیر کے مرحلے میں پہنچ کر رک گیاہے۔اس ڈیم کی تعمیر سے 10ٹی ایم سی پانی کولار -چکبالاپور اضلاع کے علاقوں فراہم کرنے اولین ترجیح دی جائے۔
