پارلیمنٹ میں اویسی کی حلف برادری کے دوران جے شری رام ، وندے ماترم کے نعرے لگائے گئے. اویسی نے بھی نعرہ تکبیر اللہ اکبر کا نعرہ بلند کیا
نئی دہلی،18/جون (ایس او نیوز/آئی این ایس انڈیا) پارلیمنٹ سیشن کے دوسرے دن آل انڈیا مجلس اتحادالمسلمین (اے آئی ایم آئی ایم) کے صدر اسد الدین اویسی نے ایم پی عہدے کا حلف لیا۔اس دوران پارلیمنٹ میں جے شری رام کے نعرے لگنے لگے۔اویسی نے کہا کہ اچھا ہے مجھے دیکھ کر انہیں یہ لفظ یاد آئے، کاش انہیں بہار میں بچوں کی موت بھی یاد آ جائے۔دراصل منگل کو جیسے ہی اویسی اپنی سیٹ سے اٹھ کر حلف کے لئے ویل میں آئے بی جے پی اور اس کے اتحادیوں کے ممبران پارلیمنٹ نے جے شری رام، بھارت ماتا کی جے، وندے ماترم کے نعرے لگانے شروع کر دیئے۔اس کے جواب میں اویسی نے بھی دونوں ہاتھوں کو اوپر اٹھاتے ہوئے زور زور سے نعرے لگانے کا اشارہ کیا۔اس کے بعد انہوں نے اپنا حلف مکمل کیا اورآخر میں جے بھیم، جے میم، اللہ ہو اکبر اور جے ہند کے نعرے لگائے۔حلف کے دوران ہوئی نعرے بازی پر اویسی نے کہا کہ اچھی بات ہے کم سے کم مجھے دیکھ کر انہیں رام کی یاد تو آئی۔انہوں نے اس پر رد عمل ظاہر کرتے ہوئے کہا کہ امید ہے کہ بی جے پی والوں کو آئین اور مظفر پور میں بچوں کی موت بھی یاد رہے گی۔اویسی مرکز کی مودی حکومت کے خلاف سب سے بیباک ہوکر بولتے آئے ہیں،پھر چاہے رام مندر کا مسئلہ ہو یا پھر تین طلاق سے منسلک بل، ان تمام اہم مسائل کو لے کر اویسی نے مسلسل 5 سال مودی حکومت کی دھجیاں اڑادی ہے۔یہی وجہ سے کہ اس گہما گہمی کا آج لوک سبھا میں بھی دیکھنے کو مل رہا ہے۔