دبئی،7نومبر(آئی این ایس انڈیا)متحدہ عرب امارات کے ایک سینئر عہدیدار نے بتایا کہ ان کی حکومت وہاٹس اپ کے ذریعے وائس کالز پر پابندی ختم کرنے کے لیے تیار ہے۔متحدہ عرب امارات کی سائبر سیکیوریٹی اتھارٹی کے ایگزیکٹو ڈائریکٹر محمد الکویتی نے’سی این بی سی‘ ٹی وی کو بتایا کہ متحدہ عرب امارات نے قومی سلامتی کے اقدامات پر بڑے ٹکنالوجی پلیٹ فارمز خصوصا فیس بک کے زیر ملکیت واٹس ایپ کے ساتھ اپنا تعاون بڑھانے کا فیصلہ کیا ہے۔انہوں نے وضاحت کی کہ ہم نے پہلے ہی وہاٹس ایپ کے ساتھ تعاون بڑھایا ہے۔ ہم نے مواصلات کو کنٹرول کرنے کے ریاست کے نقطہ نظر کے حوالے سے بہت سے منصوبوں میں اپنے تصور کی بہت اچھی تفہیم دیکھی ہے۔ متحدہ عرب امارات کی سائبر سیکیوریٹی اتھارٹی کے ایگزیکٹو ڈائریکٹر نے کہا کہ جلد ہی وہاٹس ایپ کی وائس کال پر پابندی ختم کردی جائے گی۔

خیال رہے کہ متحدہ عرب امارات میں وائس اوور انٹرنیٹ پروٹوکول (VoIP) سروسز، جن میں اسکائپ، فیس ٹائم اور واٹس ایپ جو انٹرنیٹ پر مفت آڈیو اور ویڈیو کالز کی سہولت فراہم کرتی ہیں، کے استعمال پر پابندی عائد ہے۔ تاہم ان پلیٹ فارمز سے ٹیکسٹ پیغامات کی اجازت دی گئی ہے۔خلیجی ریاستوں نے حالیہ برسوں کے دوران انٹرنیٹ پروٹوکول وائس سروسز کے حوالے سے اپنی پالیسیوں میں تبدیلی کا عمل شروع کیا ہے۔ سعودی عرب نے سنہ 2017ء کو وہاٹس ایپ کال پر عاید پابندی ختم کردی تھی۔