بیروت، 28/ستمبر (ایس او نیوز /ایجنسی) اسرائیل کی ڈیفنس فورس نے ایکس پر ایک پوسٹ میں دعویٰ کیا ہے کہ ’’اسرائیلی فوج نے بیروت، لبنان میں فضائی حملے کے ذریعے حزب اللہ کے سربراہ حسن نصراللہ کو ہلاک کر دیا ہے۔ حسن نصراللہ اب دنیا میں دہشت گردی پھیلانے کے لیے زندہ نہیں ہیں۔‘‘ تاہم، لبنان کے حزب اللہ گروپ نے اسرائیل کے اس دعوے پر ابھی تک کوئی ردعمل نہیں دیا ہے۔

اسرائیلی فوج نے مزید کہا ہے کہ احمد فہد اسرائیلی فوجیوں پر براہ راست حملوں کے ذمہ دار تھے جن میں ابتدائی طور پر گولڈن ہائٹس، اسرائیل میں راکٹ فائر شامل ہے۔ اسرائیلی اخبار دی ٹائمز آف اسرائیل نے رپورٹ کیا ہے کہ آئی ڈی ایف کے مطابق فہد کو اس وقت ختم کیا گیا ہے جب وہ اسرائیل میں دوسرے دہشت گردانہ حملے کی منصوبہ بندی کررہے تھے۔ یہ فضائی حملے فائٹر جیٹ کے ذریعے کئے گئے ہیں جن میں شام کے جنوبی علاقے کو نشانہ بنایا گیا ہے۔ یہ رپورٹ اس وقت سامنے آئی ہے جب اسرائیلی فوج نے جنوبی بیروت میں گروپ کے مضبوط گڑھ پر شدید بمباری کے بعد مشرقی لبنان میں حزب اللہ کو نشانہ بناتے ہوئے نئے حملے شروع کئے ہیں۔

اسرائیل کے فوجی ترجمان لیفٹنٹ کرنل نادو شوشانی نے ایکس پر کئے گئے اعلان میں مزید کہا ہے کہ ’’حسن نظر اللہ کی موت ہوگئی ہے۔‘‘ فوج کے ترجمان کیپٹن ڈیویڈ ابراہم نے بھی خبررساں ایجنسی اے ایف پی سے یہ تصدیق کی ہے کہ جمعہ کو لبنان کے دارالحکومت بیروت میں فضائی حملے کے ذریعے حزب اللہ کے چیف نصر اللہ کو ’’ختم ‘‘ کر دیا گیا ہے۔

نیوز ایجنسی اے ایف پی نے اپنی خبر میں حزب اللہ کے قریبی ذرائع کا حوالہ دیتے ہوئے لکھا ہےکہ ’’اسرائیلی فوج کے یہ اعلان کرنے کے بعد ،کہ اس نے بیروت، لبنان میں فضائی حملے کے ذریعے حزب اللہ کےچیف کو ختم کر دیا ہے، حزب اللہ کے چیف نصر اللہ سے کل شام سے رابطہ منقطع ہوچکا ہے۔‘‘ایک شخص نے اپنی شناخت مخفی رکھنے کی شرط پر خبر رساں ایجنسی کو بتایا ہے کہ ’’حزب اللہ کے چیف سیدحسن نصر اللہ سے جمعہ کی شام سے رابطہ منقطع ہو چکاہے۔ ‘‘تاہم، انہوں نے اس بات کی تصدیق نہیں کی ہے کہ حزب اللہ کے چیف کا قتل ہوا ہے یا نہیں۔

اسرائیلی فوج نے اپنے پوسٹ میں یہ دعویٰ بھی کیا ہے کہ اس نے بیروت، لبنان میں اسرائیلی حملے میں حزب اللہ کے جنوبی فرنٹ کے کمانڈر علی کارکی اور دیگر کمانڈروں کا بھی قتل کیاہے۔ ایران کے ۲؍ حکام کا حوالہ دیتے ہوئے دی نیویارک ٹائمز نے رپورٹ کیا ہے کہ ایران کے سپریم لیڈر آیت اللہ خامنہ ای نے اسرائیل کے فضائی حملوں کا جواب دینے کیلئے ایران سپریم نیشنل سیکوریٹی کاؤنسل کا فوری اجلاس طلب کیاہے۔