عراق میں مظاہرین نے ایرانی قونصلیٹ کو آگ لگا دی
بغداد /28نومبر (آئی این ایس انڈیا) عراق میں پرتشدد مظاہروں کے دوران مشتعل افراد نے جنوبی شہر نجف میں ایرانی قونصلیٹ کو آگ لگا دی۔خبر رساں ادارے 'رائٹرز' کے مطابق بدھ کو مظاہرین نجف کی مختلف سڑکوں پر احتجاج کرتے رہے جس کے دوران ان کی سیکیورٹی اہلکاروں کے ساتھ جھڑپیں بھی ہوئیں۔ مظاہرین نے ایرانی قونصلیٹ پہنچ کر اسے آگ لگائی۔ تاہم فوری طور پر مظاہرین کی اس کارروائی کے نتیجے میں کسی ہلاکت کی کوئی اطلاع نہیں۔پولیس اور سول ڈیفنس حکام کا کہنا ہے کہ مظاہرین کے ایرانی قونصلیٹ کے قریب پہنچنے سے قبل عملہ باہر نکل چکا تھا جب کہ مقامی میڈیا کے مطابق انتظامیہ نے واقعے کے بعد علاقے میں کرفیو نافذ کر دیا ہے۔یاد رہے کہ عراق میں ایران کی مبینہ مداخلت اور حکومت کی نااہلی کے خلاف یکم اکتوبر کو دارالحکومت بغداد سے شروع ہونے والے مظاہرے جنوبی شہروں تک پہنچ چکے ہیں۔ مظاہرین کی جانب سے ایرانی قونصلیٹ کو نذر آتش کیے جانے کا اب تک کا سب سے شدید رد عمل ہے۔مظاہرین کا کہنا ہے کہ زیادہ تر سیاست دان بدعنوان اور ایران سمیت غیر ملکی طاقتوں کے آلہ کار ہیں جب کہ 2017 میں جنگجو تنظیم داعش کو شکست دینے کے باوجود حکومت ملک میں استحکام کے لیے کی جانے والی کوششوں میں مکمل طور پر ناکام ہے۔