ایران: کلینک میں گیس لیکج کے باعث دھماکے میں 19 افراد ہلاک

Source: S.O. News Service | Published on 1st July 2020, 8:50 PM | عالمی خبریں |

تہران ،یکم جولائی(آئی این ایس انڈیا) ایران کے دارالحکومت تہران کے ایک کلینک میں گیس لیکج کے نتیجے میں ہونے والے دھماکے میں 19 افراد ہلاک ہو گئے ہیں۔

ایران کی نیم سرکاری نیوز ایجنسی 'آئی ایس این اے' کے مطابق اطہر ہیلتھ سینٹر میں اُس وقت زور دار دھماکا ہوا جب مریضوں کی بڑی تعداد وہاں علاج کے لیے موجود تھی۔ دھماکے میں چھ افراد زخمی بھی ہوئے ہیں۔

تہران کی ایمرجنسی میڈیکل سروس نے تصدیق کی ہے کہ دھماکے کے بعد 13 افراد موقع پر ہی ہلاک ہو گئے تھے جب کہ محکمہ فائر بریگیڈ کے ترجمان جلال مالکی نے خبر رساں ادارے کو بتایا کہ آگ بجھانے کے دو گھنٹے بعد مزید چھ سوختہ لاشوں کو بھی نکالا گیا ہے جس کے بعد ہلاکتوں کی کل تعداد 19 ہو گئی ہے۔

جلال مالکی کے مطابق کلینک کے تہہ خانے میں آگ لگنے سے گیس سلینڈرز میں آگ لگ گئی تھی جو دھماکے کی وجہ بنی۔

ایران کے سرکاری ٹی وی کے مطابق ہلاک ہونے والوں میں 13 خواتین شامل ہیں۔

تہران کے ڈپٹی گورنر حامد رضا گودرزی نے واقعے کے بعد سرکاری ٹی وی پر ایک انٹرویو کے دوران بتایا کہ میڈیکل کلینک میں گیس لیکج کی وجہ سے دھماکہ ہوا ہے۔

آگ لگنے کے باعث عمارت کو بھی شدید نقصان پہنچا ہے۔

واقعے کے بعد سوشل میڈیا پر متعدد ویڈیوز شیئر کی گئیں جن میں کلینک کی عمارت سے دھواں بلند ہوتے دیکھا جا سکتا ہے۔

ایک ہفتے کے دوران دارالحکومت تہران میں گیس لیکج کے باعث دھماکے کا یہ دوسرا واقعہ ہے۔

چار روز قبل تہران کے جنوب مشرقی علاقے پارچین میں ملٹری کمپلیکس کے قریب زور دار دھماکہ ہوا تھا تاہم اس میں کوئی جانی نقصان نہیں ہوا تھا۔

ایک نظر اس پر بھی

بحرین کی اسرائیل سے ڈیل،علاقائی سلامتی کو تقویت ملے گی: شیخ سلمان کی نیتن یاہو سے گفتگو

بحرین کے ولی عہد شیخ سلمان بن حمد آل خلیفہ نے اسرائیلی وزیراعظم بنیامین نیتن یاہو سے ٹیلی فون پر بات چیت کی ہے۔انھوں نے عالمی سلامتی اور امن کو مضبوط بنانے اور امن ، استحکام اور خوش حالی کے فروغ کے لیے مسلسل کوششیں جاری رکھنے کی ضرورت پر زوردیا ہے۔

ایردوآن نے یو این میں اٹھایا مسئلہ کشمیر، ’اندرونی معاملات میں دخل نہ دے ترکی‘ انڈیا کی تاکید

 جموں و کشمیر کے حوالہ سے اقوام متحدہ کی جنرل اسمبلی میں ترکی کے صدر رجب طیب اردوآن کے بیان پر اقوام متحدہ میں ہندوستان کے مستقل نمائندہ ٹی ایس ترومورتی نے سخت احتجاج کرتے ہوئے کہا ہے کہ ترکی کو دوسرے ممالک کی خودمختاری کا احترام کرنا سیکھنا چاہئے۔