بھٹکل 6/ستمبر (ایس اونیوز) بھٹکل کے ڈی وائی ایس پی ویلنٹائن ڈیسوزا کا تبادلہ منگلورو میں واقع ڈی آئی جی کے دفتر میں کیے جانے کے بعد آئی پی ایس آفیسر نکھل بلاور نے بھٹکل کے نئے اے ایس پی کے طور پر چارج لے لیا۔

نکھل بلاور چتلدرگ کے رہنے والے ہیں اور 2017کے آئی پی ایس بیاچ سے تعلق رکھتے ہیں۔انہوں نے اپنی ٹریننگ مکمل ہونے کے بعد رائچور میں پروبیشنری اے ایس پی کے فرائض انجام دئے۔ لوک سبھا انتخابات کے دوران نکھل بلاور کو کوپر گرام کے ایک انتہائی حساس علاقے میں تعینات کیا گیا تھا اور انہوں نے اپنی ذمہ داریاں بڑی خوبی کے ساتھ ادا کی تھیں۔رائچور میں اپنی تعیناتی کے دوران اسکولی بچوں کے ساتھ ’گرم کھانا‘ کھانے میں شریک ہونے اور طلبہ کے ساتھ گھل مل کر بات چیت کرنے کی تصاویر سوشیل میڈیا پر بہت ہی وائرل ہوئی تھیں اور ان کے عوام سے قریب رہنے کی عادت کو سراہاگیاتھا۔دوسرے مرحلے کی تربیت مکمل ہونے کے بعد انہیں بھٹکل سب ڈیویژن میں تعینات کیا گیا ہے۔ 

نکھل بلاور نے اپنی اعلیٰ تعلیم بنگلورو کے بی ایم ایس کالج آف انجینئرنگ سے مکمل کی ہے۔2014میں انہوں نے اپنی یو پی ایس سی کی پڑھائی شروع کی۔ 2015میں پہلی بار سول سروس امتحان میں شریک ہوئے، لیکن کامیاب نہیں ہوسکے۔ دوسری مرتبہ 2016میں انہوں نے 107ویں رینک کے ساتھ امتحان میں کامیابی حاصل کی۔دسمبر 2017سے انہیں سول سروس کے لئے نامزد کیا گیاتھا۔

پتہ چلا ہے کہ تبادلہ کیے گئے بھٹکل ڈی وائی ایس پی ویلنٹائن ڈیسوزا سے چارج لینے کے بعد نکھل بلاور فی الحال اپنے دائرہئ اختیارمیں آنے والے تمام پولیس اسٹیشنوں کا دورہ کرکے حالات کا جائزہ لے رہے ہیں۔