آئی پی ایل :سنجے بانگرآر سی بی کے ہیڈ کوچ مقرر
نئی دہلی ،09؍ نومبر(آئی این ایس انڈیا) سابق ہندوستانی کرکٹر سنجے بانگر اب رائل چیلنجرز بنگلور (آر سی بی ) کے ہیڈ کوچ ہوں گے۔ آر سی بی نے انہیں بیٹنگ مشیر کے عہدے سے ترقی دے کر ہیڈ کوچ مقررکیا ۔ سنجے بانگر کو اگلے دو سالوں کے لیے آر سی بی کا ہیڈ کوچ مقرر کیا گیا ہے۔ بانگرنے اس سال فروری میں کلب جوائن کیا تھا۔بانگر اب مائیک ہاسن کی جگہ لیں گے۔ سائمن کیٹچ نے ذاتی وجوہات کی بنا پرآر سی بی کے ہیڈ کوچ کے عہدے سے سبکدوش ہونے کے بعد مائیک ہیسن کو ہیڈ کوچ کی اضافی ذمہ داری سونپی گئی تھی۔ وہ کلب میں ڈائریکٹر آف کرکٹ آپریشنز بھی ہیں۔ بانگر کے ہیڈ کوچ بننے کے بعد مائیک اب اپنی موجودہ ذمہ داری کو اداکرتے رہیں گے۔
آر سی بی کے ٹوئٹر ہینڈل سے پوسٹ کی گئی ویڈیو میں ہیسن یہ کہتے ہوئے نظر آرہے ہیں کہ آج ہم نے سنجے بانگر کو دو سال کے لیے آر سی بی کا ہیڈ کوچ مقرر کیا ہے۔ وہ ایک معزز کوچ ہیں۔ ان کے کھلاڑیوں اور معاون عملے کے ساتھ اچھے تعلقات ہیں۔ ان کے پاس اچھا تجربہ ہے۔اپنی نئی ذمہ داری پر سنجے بانگر نے کہا کہ میں نے گزشتہ چند سالوں میں کلب کے باصلاحیت کھلاڑیوں کے ساتھ بہت کام کیا ہے۔ آئی پی ایل کی نیلامی سے لے کر اگلے سیزن تک ہمیں بہت کام کرنا ہے۔
مجھے یقین ہے کہ ٹیم مینجمنٹ اور عملے کی مدد سے ہم وہ کریں گے جو ہمیں کرنا ہے۔سنجے بانگر سال 2014 سے 2019 تک ٹیم انڈیا ٹیم انڈیا کے بیٹنگ مشیررہے ہیں۔ 2019 ورلڈ کپ کے بعد ان کی جگہ وکرم راٹھور نے لی ۔ 49 سالہ سنجے 2001 سے 2004 تک ٹیم انڈیا کے اسکواڈ میں بھی شامل رہے ہیں۔ انہوں نے 12 ٹیسٹ میچ اور 15 ون ڈے کھیلے ہیں۔