رائل چیلنجرس بنگلورو کو7 وکٹوں سے شکست دے کر 14 برس بعد راجستھان رائلس کا آئی پی ایل فائنل میں داخلہ
نئی دہی، 28؍ مئی (ایس او نیوز؍ایجنسی) تیز گیند باز پرشانت کرشنا (22 رن پر 3 وکٹ) اور عبید مکاؤ (23 رن پر 3 وکٹ)کی شاندار گیند بازی اور زبردست فارم میں چل رہے جوس بٹلر (106 ناٹ آؤٹ) کی بہترین اننگز سے راجستھان رائلز نے رائل چیلنجرس بنگلورو کو یک طرفہ انداز میں 11 گیندباقی رہتے ہوئے7 وکٹوں سے شکست دے کر 14 برسوں کے طویل وقفے کے بعد آئی پی ایل کے فائنل میں داخل ہوگئی۔
بنگلورو نے آئی پی ایل کوالیفائر 2 میں 20 اوور میں آٹھ وکٹ پر 157 رنز بنائے لیکن راجستھان نے 18.1 اوور میں تین وکٹ پر 161 رنز بناکر میچ جیت لیا ۔ راجستھان نے 2008 میں پہلے آئی پی ایل کے فائنل میں پہنچ کر ٹائٹل جیتا تھا۔اب 14 سال بعد راجستھان نے 2022 میں فائنل میں پھر جگہ بنا لی ہے۔ بٹلر نے اپنی سنچری مکمل کی اور ویراٹ کوہلی کے 2016 میں چار سنچریاں بنانے کا ریکارڈ برابر کیا۔
گلین میکسویل کو ٹرینٹ بولٹ نے جب پویلین لوٹایا تو اسی وقت راجستھان کی جیت کے آثار نظر آنے لگ گئے تھے۔ بولٹ کی گیند حالانکہ اتنی اچھی نہیں تھی۔ لیگ اسٹمپ پر بیک آف دی لینتھ گیند تھی جسے میکسویل نے لانگ لیگ کی طرف پل کردیا تھامگر مکائے نے آگے ڈائیونگ کرتے ہوئے گیند پر جھپٹا مار کر اسے لپک لیا۔ میکسویل نے 13 گیندوں پر 24 رنز میں ایک چوکا اور دو چھکے لگائے۔
ان کے بعد اشون نے شاندار کھیل رہے رجت پاٹیدار کو آؤٹ کر کے راجستھان خیمے میں خوشی کا ماحول بھر دیا۔ پاٹیدار نے 42 گیندوں پر 58 رن میں چار چوکے اور تین چھکے لگائے۔
مکاے نے مہیپال لومرور (8) کو آؤٹ کر کے راجستھان کو ایک اور کامیابی دلائی۔پرسدھ کرشنا نے 19ویں اوور کی پہلی گیند پر دنیش کارتک اور اگلی گیند پر ونندو ہسرنگا کو پویلین بھیجا۔ کارتک نے چھ رن بنائے جبکہ ہسرنگااپنا کھاتہ ہی نہیں کھول سکے۔ شہباز احمد آٹھ گیندوں پر 12 رن بنا کر ناٹ آؤٹ ہوئے۔