راشد خان کی عمدہ گیند بازی اور بیرسٹو کی شاندار بلے بازی کے بدولت سن رائزرس حیدرآباد نے کنگس الیون پنجاب کو دی شکست

Source: S.O. News Service | Published on 9th October 2020, 3:44 PM | اسپورٹس |

ابوظہبی،9؍اکتوبر(ایس او نیوز؍ایجنسی) افغانستان سے تعلق رکھنے والے اسپن گیندباز راشد خان کا جادو آج ایک بار پھر دیکھنے کو ملا۔ نکولس پورن جب طوفانی اننگ کھیلتے ہوئے تن تنہا پنجاب کے اسکور کو آگے بڑھا رہے تھے تو انھیں 77 رن (37 گیندوں پر) کے اسکور پر راشد خان نے نٹراجن کے ہاتھوں کیچ کرا دیا۔ اس کے بعد تو جلد ہی پنجاب کی ٹیم سمٹ گئی اور حیدر آباد کے 201 رن کے جواب میں 16.5 اوور میں محض 132 رن ہی بنا سکی۔ راشد خان کی گیندبازی لاجواب رہی جنھوں نے 4 اوور میں محض 12 رن دے کر 3 وکٹ لے لیے۔

سنرائزرس حیدر آباد کے کپتان ڈیوڈ وارنر نے ٹاس جیت کر بلے بازی کا فیصلہ کیا تھا اور ایک لاجواب شروعات دونوں سلامی بلے بازوں نے ٹیم کو دی۔ 15.1 اوور میں جب حیدر آباد کا پہلا وکٹ گرا تو ٹیم کا اسکور 160 رن تھا۔ اس سے انداز ہوتا ہے کہ وارنر اور بیرسٹو نے کیا لاجواب کھیل کا مظاہرہ کیا۔ لیکن دلچسپ بات یہ ہے کہ 160 کے اسکور پر ہی دونوں سلامی بلے باز پویلین لوٹ گئے۔ پہلے وارنر (40 گیندوں پر 1 چھکا اور 5 چوکے کی مدد سے 52 رن) روی بشنوئی کی گیند پر میکسویل کو کیچ دے بیٹھے، اور پھر اسی اوور میں جانی بیرسٹو 55 گیندوں پر شاندار 6 چھکّوں اور 7 چوکوں کی مدد سے 97 رن پر ایل بی ڈبلیو ہو گئے۔

ان دونوں بلے بازوں کے آؤٹ ہونے کے بعد حیدر آباد کی ٹیم کچھ خاص کارکردگی نہیں کر سکی۔ منیش پانڈے محض ایک رن بنا کر اور عبدالصمد 8 رن بنا کر پویلین لوٹ گئے۔ کین ولیمسن نے 10 گیندوں پر شاندار 20 رن (ناٹ آؤٹ) اور ابھشیک شرما نے 6 گیندوں پر تیز 12 رن بنائے جس کے سبب اسکور 200 کے پار پہنچ سکا۔ پریم گرگ تو بغیر کوئی رن بنائے ہی آؤٹ ہو گئے۔ راشد خان صفر پر ناٹ آؤٹ رہے۔ 15 اوور میں جہاں حیدر آباد کا اسکور بغیر کسی نقصان کے 160 رن تھا، وہی 20 اوور کے بعد اسکور 6 وکٹ کے نقصان پر 201 رن تک محدود رہ گیا۔ لیکن یہ اسکور بھی کوئی چھوٹا اسکور نہیں تھا۔

پنجاب کی طرف سے عرش دیپ نے کافی متاثر کیا جنھوں نے 4 اوور میں 33 رن دے کر 2 وکٹ لیے۔ سب سے کامیاب گیندباز روی بشنوئی رہے جنھوں نے 3 اوور میں 29 رن دے کر 3 وکٹ لیے۔ بقیہ گیندباز کافی مہنگے ثابت ہوئے۔ شیلڈن کوٹریل نے 3 اوور میں 33 رن خرچ کر دیے، مجیب الرحمن نے 4 اوور میں 39 رن دیے، میکسویل نے 2 اوور میں 26 رن پٹائے اور ان تینوں کو ہی کوئی وکٹ حاصل نہیں ہوا۔ محمد سمیع نے 4 اوور میں 40 رن دے کر ایک وکٹ لیا۔

202 رن کے بڑے ہدف کا پیچھا کرنے اتری پنجاب کی ٹیم شروعات ہی خراب رہی۔ پہلے تو فارم میں چل رہے مینک اگروال محض 9 رن (6 گیندوں پر) بنا کر رن آؤٹ ہو گئے، او رپھر میدان میں اترے نئے بلے بازن سمرن سنگھ بھی کچھ خاص کارنامہ نہیں کر سکے۔ وہ 8 گیندوں میں 11 رن بنا کر خلیل احمد کا شکار ہو گئے۔ جلد ہی کپتان کے ایل راہل بھی 11 رن بنا کر پویلین لوٹ گئے۔ حالانکہ جب راہل ساتویں اوور میں آؤٹ ہوئے اس وقت رَن ریٹ بہت برا نہیں تھا اور ٹیم کا اسکور 58 رن تھا۔ دراصل نکولس پورن میدان میں اتر چکے تھے اور انھوں نے تیزی کے ساتھ رن بنانا شروع کر دیا تھا۔

نکولس پورن کے ساتھ گلین میکسویل کی اننگ جب آگےبڑھ رہی تھی تو ایسا لگ رہا تھا کہ کچھ الٹ پھیر ہو سکتا ہے، لیکن غلط وقت میکسویل ایک خطرناک رن لینے کی کوشش میں آؤٹ ہو گئے۔ انھوں نے 12 گیندوں پر 7 رن بنائے۔ پھر جلد ہی مندیپ سنگھ بھی 6 رن بنا کر پویلین لوٹ گئے۔ چھٹا وکٹ بھی مجیب الرحمن (1 رن) کی شکل میں 14ویں اوور میں گر گیا۔ اس وقت ٹیم کا اسکور 126 رن تھا۔ صرف نکولس پورن ہی تھے جو طوفانی بلے بازی کرتے ہوئے ایک طرف سے مقابلے کو زندہ رکھے ہوئے تھے، لیکن 15ویں اوور میں وہ 37 گیندوں پر شاندار 77 رن (7 چھکّے، 5 چوکے) بنا کر راشد خان کا شکار ہو گئے۔ یہیں پر میچ ختم ہوتا ہوا محسوس ہونے لگا۔

آخر میں محمد سمیع (صفر)، شیلڈن کوٹریل (صفر) اور عرش دیپ (صفر) رن نے حیدر آباد کے گیندبازوں کا کوئی مقابلہ نہیں کیا اور یکے بعد دیگرے پویلین واپسی کی راہ اختیار کی۔ روی بشنوئی 7 گیندوں پر 6 رن بنا کر ناٹ آؤٹ رہے۔ پوری ٹیم 16.5 اوور میں محض 132 رن بنا کر آؤٹ ہو گئی اور میچ میں نے 69 رنوں کی شکست فاش ہاتھ لگی۔

ہر بار کی طرح اس بار بھی راشد خان کا جادو سر چڑھ کر بولا۔ انھوں نے 4 اوور میں محض 12 رن دے کر 3 وکٹ لے لیے۔ خلیل احمد نے 3 اوور میں 24 رن دے کر 2 وکٹ اور نٹراجن نے 3.5 اوور میں 24 رن دے کر 2 وکٹ لیے۔ ایک وکٹ ابھشیک شرما کو حاصل ہوا لیکن انھوں نے 1 اوور میں 15 رن دے دیے۔ سب سے زیادہ مہنگے تو عبدالصمد ثابت ہوئے جنھوں نے اپنے ایک ہی اوور میں 28 رن دے ڈالے اور ان کے اوور میں نکولس پورن نے 4 چھکّوں کے ساتھ ایک چوکا بھی لگایا۔ سندیپ شرما نے 4 اوور میں 27 رن دیے اور انھیں کوئی وکٹ نہیں ملا۔

ایک نظر اس پر بھی

حیدرآباد نے آئی پی ایل کا سب سے بڑا اسکور بنایا ، ممبئی کو 31 رنز سے دی بری طرح شکست

آئی پی ایل 2024 کے 8ویں میچ میں سن رائزرز حیدرآباد نے ممبئی انڈینز کو 31 رنز سے شکست دے دی۔ میچ میں حیدرآباد نے پہلے بیٹنگ کرتے ہوئے مقررہ 20 اوورز میں 3 وکٹوں پر 277 رنز بنائے۔ جواب میں ممبئی کی ٹیم 20 اوورز میں 246/5 ​​رنز ہی بنا سکی۔ تلک ورما نے ممبئی کے لیے کافی دیر کوشش کی اور 64 رنز کی ...

آئی پی ایل 2024: دفاعی چمپئن چنئی نے جیت کے ساتھ کیا آغاز، بنگلورو کو 6 وکٹ سے ملی شکست

آج آئی پی ایل 2024 کا پہلا میچ دفاعی چمپئن چنئی سپرکنگز (سی ایس کے) اور رائل چیلنجرس بنگلور (آر سی بی) کے درمیان کھیلا گیا جس میں چنئی کو 6 وکٹ سے جیت ہاتھ لگی ہے۔ بنگلورو نے چنئی کے سامنے جیت کے لیے 174 رنوں کا ہدف رکھا تھا جسے اس نے 18.4 اوورس میں محض 4 وکٹ کے نقصان پر حاصل کر لیا۔ اس ...

ہندوستان نے پانچویں ٹیسٹ میں انگلینڈ کو اننگ اور 64 رن سے شکست ، سیریز پر 4-1 سے قبضہ

دھرم شالہ میں کھیلے جا رہے پانچویں ٹیسٹ میچ میں ہندوستان نے انگلینڈ کو اننگز اور 64 رنز سےشکست دی  ہے۔ اس طرح ہندوستان نے سیریز 4-1 سے جیت لی۔ ہندوستانی ٹیم نے میچ کے تیسرے دن انگلینڈ کو بڑی شکست دی۔ انگلینڈ کی ٹیم دوسری اننگز میں بھی بری طرح لڑکھڑا گئی۔ صرف جو روٹ ہی بلے سے کچھ ...

ہندوستان نے دوسرے ٹیسٹ میں انگلینڈ کو 106 رنوں سے دی شکست، سیریز 1-1 سے برابر

) ہندوستان نے پہلے ٹیسٹ میچ میں انگلینڈ سے ملی شکست کا بدلہ آج وشاکھاٹنم میں لے کر سیریز کو 1-1 سے برابر کر دیا ہے۔ 5 ٹیسٹ میچوں کی سیریز کا دوسرا ٹیسٹ ہندوستان نے 106 رنوں سے جیت لیا ہے۔ اس جیت کے ہیرو پلیئر آف دی میچ جسپریت بمراہ رہے جنھوں نے دونوں اننگ میں مجموعی طور پر 9 ...

کیپ ٹاؤن میں ہندوستان کی جنوبی افریقہ پر تاریخی فتح، میچ دوسرے ہی دن ختم، ٹیسٹ سیریز 1-1 سے برابر

ہندوستانی مینس کرکٹ ٹیم نے 2024 کا آغاز ایک شاندار اور ریکارڈ ساز جیت کے ساتھ کیا ہے۔ کیپ ٹاؤن کے نیولینڈس میں 3 جنوری سے شروع ہوا ٹیسٹ میچ 4 جنوری یعنی دوسرے دن ہی ختم ہو گیا۔ ہندوستان کو جیت کے لیے دوسری اننگ میں 79 رنوں کا ہدف ملا تھا جسے روہت بریگیڈ نے محض 3 وکٹ کے نقصان پر حاصل ...

جنوبی آفریقہ نے پہلے ٹیسٹ میں انڈیا کو دی ایک اننگ اور 32 رنوں سے شکست

جنوبی افریقہ کے خلاف دو ٹیسٹ میچوں کی سیریز کا پہلا ٹیسٹ ہندوستانی ٹیم ایک اننگ اور 32 رنوں سے ہار گئی ہے۔ اس شرمناک شکست کا ذمہ دار ہندوستانی بلے باز اور گیندبازوں دونوں رہے، کیونکہ پہلی اننگ میں کسی طرح 245 رن کا اسکور بنانے کے بعد ہندوستانی ٹیم دوسری اننگ میں محض 131 رنوں پر ...